Соопштенија
alt
Поттик за истражувањето на актуелните општествени случувања - Средба со гимназиска група од Меѓународното училиште НОВА
Четврток, 09 Јуни 2011

Претседателот на Република Македонија д-р Ѓорге Иванов денеска во својот Кабинет прими гимназиска група од 23 ученици од Меѓународното училиште НОВА, кои во текот на изминатата година интензивно работеа на истражувачки проект фокусиран на спорот за името меѓу Република Македонија и јужниот сосед, Грција.

Нивното истражување е реализирано во соработка со Институтот Њускуп при Универзитетот Харвард и опфаќа историски, социолошки, економски и меѓународно-политички аспекти, внимателно анализирајќи ги позициите и на двете земји.

Претседателот Иванов ја поздрави оваа иницијатива која има за цел да го поттикне истражувачкиот дух на младите во однос на општетствено-политички актуелни теми, изразувајќи поддршка кон напорите да се користат истражувачките техники во образованието со кои ќе им се овозможи на учениците да развијат информирани ставови, конструктивен дискурс и поголемо меѓусебно разбирање.

„Имав прилика да разговарам со исклучително интелигентна и мотивирана група млади луѓе и да ги чујам нивните ставови во однос на овој комплексен и деликатен билатерален спор со кој ние, како држава, се соочуваме веќе две децении. Сметам дека е особено важно да се поттикнуваат младите да размислуваат и донесуваат заклучоци засновани на аргументи, да спроведуваат сестрани истражувања при анализа на кој било феномен или појава. Навистина ме воодушеви нивната посветеност во овој истражувачки проект, но и издржаната и продуктивна дискусија која ја имав со нив,“ рече Претседателот д-р Ѓорге Иванов.

Средбата со Претседателот Иванов претставува заокружување на нивните истражувачки напори, награда за нивниот труд и можност нивните размислувања и ставови да ги образложат пред Шефот на државата, воедно и универзитетски професор во сферата на политичките науки.

„Спорот беше предмет на интересирање на оваа група од НОВА веќе цела една година. Групата годинава изучува новинарство и компаративна политика, ни доаѓа од 6 земји од соседството и подалеку, но и ги содржи сите поголеми етникуми од Република Македонија. Во претходниот период многу сплотено и искрено се интересираа за спорот со името, процес кој што кулминира денес, преку оваа средба на Претседателот Иванов со учениците,“ истакна Директорот на Меѓународното средно училиште НОВА и професор по економски науки, Виктор Новаковски кој активно го потпомогна истражувачкиот процес на младите ентузијасти вклучени во овој проект.

Краткиот документарен филм кој ќе произлезе како финален резултат на истражувачкиот процес, ќе биде објавен на веб-страната на Институтот Њускуп при Универзитетот Харвард.
 

alt
На 5 јуни да ја потврдиме нашата демократска зрелост и нашата приврзаност кон евроатлантските вредности - порака на Претседателот Иванов до граѓаните на РМ
Петок, 03 Јуни 2011

По повод претстојните парламентарни избори кои што ќе се одржат во недела 05.06.2011година, Претседателот на Република Македонија д-р Ѓорге Иванов ја упати следната порака до граѓаните на Република Македонија.

Почитувани граѓани,

Во годината кога славиме две децении од независноста и една деценија од Охридскиот рамковен договор, во годината кога очекуваме продолжување на европските и евроатлантските интеграции, моите очекувања и мојот апел до сите вас, е во недела, на 5 јуни, уште еднаш да ја потврдиме нашата демократска зрелост, да ја потврдиме нашата приврзаност кон евроатлантските вредности, да ја прославиме демократијата.

Во недела, граѓаните треба да го дадат својот глас за оние што во следните четири години ќе ги претставуваат во Собранието на Република Македонија. Оние кои во Ваше име, ќе треба да носат одлуки за тоа што Македонија ќе треба да го оствари, односно за што поскоро остварување на нашите стратешки цели. Во недела сета моќ е во вашите раце. Тоа е Ваш ден. Вие одлучувате.

Апелирам тоа да го направите на достоинствен начин, во слободна и демократска атмосфера. Докажавме во многу наврати во овие две децении дека сме рамо до рамо со сите напредни демократии. Денес, за мене е неприфатливо ништо помалку од фер, демократски, слободни и чесни избори.

Никој во нашата земја нема право воден од тесни интереси да ги стави во залог интересите на граѓаните, на државата. Секој оној што ќе се осмели да ги наруши изборните правила, секој оној што на кој било начин ќе ги загрози интересите и перспективите на граѓаните и државата, ќе се соочи со најсилна можна институционална и општествена реакција.

alt
Претседателот Иванов во Софија на Меѓународна конференција за Балканот
Сабота, 28 Мај 2011
alt
Претседателот Иванов ќе присуствува на 17-тиот Состанок на Претседатели од Централна Европа во Варшава
Четврток, 26 Мај 2011

На 27 и 28 мај, Претседателот на Република Македонија д-р Ѓорге Иванов ќе учествува на 17-тиот Состанок на Претседатели од Централна Европа во Варшава, Полска.

Оваа традиционална средба на претседателите од регионот, која се одржува секоја година од 1993 наваму, има цел да овозможи непосреден и рамноправен дијалог на директните соседи и на сите европски држави по местоположба и вокација, за сите прашања од взаемен интерес.

Темите на дискусија се поврзани со актуелните политички и економски проблеми и предизвици во земјите од централно-европскиот регион, но и глобалните политички прашања на европскиот континент и пошироко. Централна тема на состанокот оваа година е „Локалните искуства и универзалните стандарди“, а ќе се дискутира за различните искуства на земјите во процесите на системска трансформација, демократскиот развој, создавањето отворен пазар, како и за идните перспективи и предизвици.

На 17-тиот состанок во Варшава ќе учествуваат вкупно 22 претседатели на држави - Албанија, Австрија, Босна и Херцеговина, Бугарија, Хрватска, Чешка, Германија, Унгарија, Италија, Македонија, Молдавија, Црна Гора, Полска, Романија, Србија, Словачка, Словенија, Украина, Латвија, Литванија и Косово, а како специјален гостин ќе биде присутен и Претседателот на САД, Барак Обама.

Пред крајот на Варшавскиот состанок, предвидена е заедничка вечера на сите европски претседатели со Претседателот на САД Барак Обама, а ќе се разговара за искуствата на земјите од Централна Европа во унапредувањето на демократијата, просперитетот и стабилноста во Европа, како и за револуциите на Средниот Исток и Северна Африка, импликациите врз Европа и поддршката за нивната демократска транзиција.

Покрај учеството во дебатите на зададените теми, Претседателот Иванов ќе оствари повеќе билатерални и неформални средби со европски лидери.
 

alt
Честитка по повод 24 мај – Денот на Светите браќа Кирил и Методиј
Вторник, 24 Мај 2011

Почитувани граѓани,

Во време кога ги живееме врвните цивилизациски придобивки, кога нашиот животен пат се заснова и зацртува преку образованието и знаењето, кога ги надградуваме нашите човечки и хумани вредности во еден обединет свет кој тежнее кон развој, да се потсетиме на оние светли ликови кои го трасираа тој наш пат и кои со нивното дело задолжија многу генерации пред и по нас.

Денес е денот кога го чествуваме делото на македонските и сесловенски просветители и учители, Светите браќа Кирил и Методиј, кога уште еднаш со огромна благодарност се сеќаваме на непроценливото наследство кое ни го оставија, и тоа не само нам, туку и на сите словенски народи.

Како што кажува една стара мудрост – крајот на сознанието се затвора на крајот од вечноста. Секоја генерација го темели својот напредок врз претходните, наследените знаења. Со својата неуморна работа и посветеност Кирил и Методиј го отворија патот на писменоста и ширењето на христијанскиот дух, одбележувајќи ја епохата на будење на словенските народи, придонесувајќи кон севкупниот европски цивилизациски подем. Нивниот придонес за македонската култура и духовен развој, како и втемелувањето на традицијата на верски и културен соживот, претставува срж на нашето бидување денес како нација горда на своето минато, спремна за својата иднина.

Празнувајќи го 24 мај, Денот на Св. Кирил и Методиј, уште еднаш ја потврдуваме нашата верба во добрината и силината на човечкиот дух, еднаквоста и слогата меѓу народите, ја потврдуваме нашата доследност кон светлите принципи кои браќата Кирил и Методиј ги поставија за нас.

Нека ни е честит овој голем празник!

д-р Ѓорге Иванов
 

alt
Честитка до припадниците на Влашката заедница по повод Денот на Власите, 23 мај
Понеделник, 23 Мај 2011

23 мај го празнуваме денот посветен на исполнување на аманетот кој на Власите им го остави големиот поет Константин Белемаче: „Целата радост и светлина во домот, за оној што мајчиниот јазик не го заборава!“ Овој родителски, општочовечки завет е вграден во темелите на македонската државност, но и во македонската мултиетничка демократија насочена кон чување, развивање и промовирање на етничкото, јазичното и културното богатство на Република Македонија.

За посветеноста на Република Македонија зборува фактот што во 2007 година, на 10 годишниот јубилеј од донесувањето на Препораката 1333 на Парламентарното Собрание на Советот на Европа, беше истакнато дека токму Република Македонија е пример за сите други држави за тоа како треба да се негува, унапредува и промовира влашкиот јазик и култура, не само со зборови, туку и со дела.

Република Македонија е горда на влашката заедница, која е уставно призната и општествено ценета, и која со својата трудољубивост и богата култура претставува нераскинлив дел од историјата на нашата држава. Од Илинденската епопеја и Крушевската Република, преку Народно-ослободителната борба и АСНОМ-ска Македонија, па сè до третиот Илинден. Прогласувањето на македонската самостојност, независност и сувереност на 8 септември 1991 година беше првата телевизиска вест емитувана на влашки јазик, означувајќи го со тоа и почетокот на дводецениското работење на Редакцијата на влашки јазик. Македонската телевизија беше и се уште е единствената национална телевизија во светот која емитува програма на влашки јазик.

До сега направеното е пример за другите, но воедно и обврска за нас да продолжиме по истиот пат. Свесна дека нема ништо посвето од идентитетот, Република Македонија посветено и со гордост го негува општествениот придонес на Власите. Токму затоа, силно е поддржана иницијативата за воспоставување на центар посветен на зачувување, проучување и промовирање на влашкиот јазик, култура, историја и традиција.

На тој начин, Македонија го нагласува единството на македонското национално ткиво и присуството на Власите низ историјата, сплотеност запечатена со двата Илиндена, сплотеност препознатлива низ придонесот на бројните Власи хуманисти, научници и уметници со светска слава. Тоа е и конкретен чекор во насока на негувањето на заедничкиот именител од прастари времиња, збогатувајќи ја со тоа и македонска културна матрица. На тоа обврзува заветот на Белемаче, на тоа нè обврзува нашата заедничка европска и евроатлантска иднина на оваа и на наредните генерации.

Во оваа прилика би сакал на сите Власи во Република Македонија да им го честитам овој светол празник.


д-р Ѓорге Иванов
 

 
Почеток < Пред 151 152 153 154 155 156 157 158 159 160 Следно > Крај
Страница 157 од 172