Соопштенија
alt
Претседателот Иванов ги прими акредитивните писма на новиот амбасадор на Литванија
Петок, 17 Јуни 2011

Претседателот на Република Македонија д-р Ѓорге Иванов денеска ги прими акредитивните писма на новиот вонреден и ополномоштен амбасадор на Република Литванија со седиште во Будимпешта, Н.Е. г-дин Ренатас Јушка.

Претседателот Иванов изрази благодарност за поддршката која Литванија ја дава на Република Македонија за целосна интеграција во Европската унија, нагласувајќи дека процесот на евро и евроатлантска интеграција, претставува еден од клучните интегрирачки фактори и двигател на реформските процеси, поради што ужива  апсолутен политички и социјален консензус.

Претседателот Иванов и амбасадорот Јушка изразија заемна надеж дека економската соработката помеѓу двете земји во наредниот период ќе се интензивира, особено во сферата на трговска размена, земајќи ја предвид скорешната либерализација за трговија со индустриски производи.

„Република Македонија придава посебно значење на развојот на односите со Република Литванија. Верувам дека ни претстои период на поинтензивен политички дијалог на сите нивоа, и јакнење на севкупната соработка подеднакво на билатерален и на мултилатерален план. Верувам дека мерките и активностите што ги презема Владата на Република Македонија за постојано подобрување на инвестициската и вкупната деловна клима, ќе придонесат за унапредување на односите и на ова поле,“ рече Претседателот Иванов.
 

alt
Крводарителска акција во Народната канцеларија на Претседателот Иванов
Среда, 15 Јуни 2011
alt
Средба со д-р Ферид Мурад, добитник на Нобелова награда од областа на медицината и клиничката фармакологија
Понеделник, 13 Јуни 2011

Претседателот на Република Македонија д-р Ѓорге Иванов денеска го прими д-р Ферид Мурад, добитник на Нобелова награда од областа на медицината и клиничката фармакологија.

На срдечната средба, д-р Мурад ги поздрави напорите на граѓаните на Република Македонија за развивање и негување на соживотот во едно мулти-културно општество и се заложи да го искористи својот углед во американското општество да лобира за Македонија за што поскоро остварување на стратегиските цели на земјата - членство во ЕУ и НАТО. Д-р Мурад се интересираше за состојбите во здравството и медицинското образование во Република Македонија, идентификувајќи ги сферите на можна идна соработка.

Претседателот Иванов му честита на д-р Ферид Мурад за сите досегашни постигнати успеси, изразувајќи надеж дека и понатаму неговите истражувачки проекти ќе придонесуваат кон унапредување на медицината и фармакологијата насекаде во светот. Претседателот Иванов воедно ја искажа и својата благодарност кон фактот што д-р Мурад своите успеси ги припишува и како успеси на Република Македонија.

На средбата се разговараше за евро-атлантските интеграции на Република Македонија, нејзината улога на меѓународен план, како и за проблемот со името со јужниот сосед кој ги отежнува тие процеси.

Универзитетскиот професор и истражувач д-р Ферид Мурад кој потекнува од Гостиварско, а живее и работи во Хјустон, Тексас е добитник на бројни награди и признанија за истражувања во областа на медицината. Најзначајното достигнување во неговата научна и истражувачка дејност е добивањето на Нобелова награда за медицина и физиологија во 1998 година за откритието поврзано со примената на нитричкиот оксид како сигнален молекул во кардио-васкуларниот систем.
 

alt
Поттик за истражувањето на актуелните општествени случувања - Средба со гимназиска група од Меѓународното училиште НОВА
Четврток, 09 Јуни 2011

Претседателот на Република Македонија д-р Ѓорге Иванов денеска во својот Кабинет прими гимназиска група од 23 ученици од Меѓународното училиште НОВА, кои во текот на изминатата година интензивно работеа на истражувачки проект фокусиран на спорот за името меѓу Република Македонија и јужниот сосед, Грција.

Нивното истражување е реализирано во соработка со Институтот Њускуп при Универзитетот Харвард и опфаќа историски, социолошки, економски и меѓународно-политички аспекти, внимателно анализирајќи ги позициите и на двете земји.

Претседателот Иванов ја поздрави оваа иницијатива која има за цел да го поттикне истражувачкиот дух на младите во однос на општетствено-политички актуелни теми, изразувајќи поддршка кон напорите да се користат истражувачките техники во образованието со кои ќе им се овозможи на учениците да развијат информирани ставови, конструктивен дискурс и поголемо меѓусебно разбирање.

„Имав прилика да разговарам со исклучително интелигентна и мотивирана група млади луѓе и да ги чујам нивните ставови во однос на овој комплексен и деликатен билатерален спор со кој ние, како држава, се соочуваме веќе две децении. Сметам дека е особено важно да се поттикнуваат младите да размислуваат и донесуваат заклучоци засновани на аргументи, да спроведуваат сестрани истражувања при анализа на кој било феномен или појава. Навистина ме воодушеви нивната посветеност во овој истражувачки проект, но и издржаната и продуктивна дискусија која ја имав со нив,“ рече Претседателот д-р Ѓорге Иванов.

Средбата со Претседателот Иванов претставува заокружување на нивните истражувачки напори, награда за нивниот труд и можност нивните размислувања и ставови да ги образложат пред Шефот на државата, воедно и универзитетски професор во сферата на политичките науки.

„Спорот беше предмет на интересирање на оваа група од НОВА веќе цела една година. Групата годинава изучува новинарство и компаративна политика, ни доаѓа од 6 земји од соседството и подалеку, но и ги содржи сите поголеми етникуми од Република Македонија. Во претходниот период многу сплотено и искрено се интересираа за спорот со името, процес кој што кулминира денес, преку оваа средба на Претседателот Иванов со учениците,“ истакна Директорот на Меѓународното средно училиште НОВА и професор по економски науки, Виктор Новаковски кој активно го потпомогна истражувачкиот процес на младите ентузијасти вклучени во овој проект.

Краткиот документарен филм кој ќе произлезе како финален резултат на истражувачкиот процес, ќе биде објавен на веб-страната на Институтот Њускуп при Универзитетот Харвард.
 

alt
На 5 јуни да ја потврдиме нашата демократска зрелост и нашата приврзаност кон евроатлантските вредности - порака на Претседателот Иванов до граѓаните на РМ
Петок, 03 Јуни 2011

По повод претстојните парламентарни избори кои што ќе се одржат во недела 05.06.2011година, Претседателот на Република Македонија д-р Ѓорге Иванов ја упати следната порака до граѓаните на Република Македонија.

Почитувани граѓани,

Во годината кога славиме две децении од независноста и една деценија од Охридскиот рамковен договор, во годината кога очекуваме продолжување на европските и евроатлантските интеграции, моите очекувања и мојот апел до сите вас, е во недела, на 5 јуни, уште еднаш да ја потврдиме нашата демократска зрелост, да ја потврдиме нашата приврзаност кон евроатлантските вредности, да ја прославиме демократијата.

Во недела, граѓаните треба да го дадат својот глас за оние што во следните четири години ќе ги претставуваат во Собранието на Република Македонија. Оние кои во Ваше име, ќе треба да носат одлуки за тоа што Македонија ќе треба да го оствари, односно за што поскоро остварување на нашите стратешки цели. Во недела сета моќ е во вашите раце. Тоа е Ваш ден. Вие одлучувате.

Апелирам тоа да го направите на достоинствен начин, во слободна и демократска атмосфера. Докажавме во многу наврати во овие две децении дека сме рамо до рамо со сите напредни демократии. Денес, за мене е неприфатливо ништо помалку од фер, демократски, слободни и чесни избори.

Никој во нашата земја нема право воден од тесни интереси да ги стави во залог интересите на граѓаните, на државата. Секој оној што ќе се осмели да ги наруши изборните правила, секој оној што на кој било начин ќе ги загрози интересите и перспективите на граѓаните и државата, ќе се соочи со најсилна можна институционална и општествена реакција.

alt
Претседателот Иванов во Софија на Меѓународна конференција за Балканот
Сабота, 28 Мај 2011
 
Почеток < Пред 141 142 143 144 145 146 147 148 149 150 Следно > Крај
Страница 148 од 163