Соопштенија
Евроамбасадорот Фуере го предаде извештајот на Европската Комисија на Претседателот Иванов
Вторник, 09 Ноември 2010


Претседателот на Република Македонија д-р Ѓорге Иванов оствари средба со евроамбасадорот Ерван Фуере кој лично му го предаде Извештајот за напредокот на Република Македонија за 2010 година подготвен од Европската Комисија.
На средбата евроамбасадорот Фуере,  го информираше Иванов за клучните оценки на Европската Комисија во кои се нотирани извесни слабости, но и прогресот кој нашата земја го постигна изминатава година.
Фуере искажа благодарност во името на сите  членки на Европската Унија  за напорите кои ги вложува нашата држава, на сите полиња, важни за создавањето на една позитивна клима во целото општество.
Претседателот Иванов истакна дека Извештајот на Европската Комисија и оваа година како и претходните дава реална слика на сработеното и на постигнувањата на земјата, изразувајќи особено задоволство од потврдената препорака за подготвеноста на Република Македонија  за почеток на пристапните преговори.
Претседателот Иванов посочи дека извештајот е добар ориентир каде да се фокусира енергијата,  дополнувајќи дека во претстојниот период како Претседател ќе го вложи својот авторитет сите институции во Република Македонија  да се сосредоточат кон вложување на дополнителни напори со цел остварување на реформската агенда.

СООПШТЕНИЕ
Среда, 27 Октомври 2010


Почитувани,

Согласно Законот за слободен пристап до информации од јавен карактер а во врска со јавно изнесеното барање на Кабинетот на поранешниот Претседател на Република Македонија г. Бранко Црвенковски и интересот на медиумите за добивање прецизни информации за ангажманот на консултантите од Република Словенија од страна на Кабинетот на Претседателот на Република Македонија во време кога г. Бранко Црвенковски ја извршуваше функцијата,  информираме дека по досегашната проверка на документацијата која постои во архивата на Кабинетот е утврдена следната фактичка состојба:

Кабинетот на Претседателот на Република Македонија во време кога г. Бранко Црвенковски ја извршуваше функцијата, има склучено договори за соработка, обезбедување на развој и истражување со 3 лица од Република Словенија кои се предмет на актуелниот интерес во јавноста.

Договорите во име на Кабинетот на претседателот на Република Македонија кога г. Бранко Црвенковски ја извршуваше функцијата, се потпишани од страна на тогашниот Генерален секретар на Кабинетот.

Согласно постоечките договори за ангажманот на консултантите од Р. Словенија, од буџетот на Претседателот на Република Македонија се исплатени финансиски средства во висина од  20.764.057 (дваесет милиони седумстотини шеесет и четири илјади и педесет и седум) денари , односно вкупна сума од 340.394 (триста четириесет илјади и триста деведесет и четири) евра, пресметано согласно средниот курс на Народната банка на Република Македонија.

На првиот консултант од Република Словенија му се исплатени 8.305.626 (осум милиони триста и пет илјади шестотини дваесет и шест) денари, односно 136.157 (сто и триесет и шест илјади и сто педесет и седум) евра.

На вториот консултант од Република Словенија му се исплатени 5.149.482 (пет милиони сто четириесет и девет илјади четиристотини осумдесет и два) денари, односно 84.417 (осумдесет и четири илјади и четиристотини и седумнаесет) евра.

На третиот консултант од Република Словенија му се исплатени 7.308.949 (седум милиони триста и осум илјади деветстотини четириесет и девет) денари, односно 119.818 (сто и деветнаесет илјади осумстотини осумнаесет) евра.

Кабинетот на Претседателот на Република Македонија се надева дека со објавување на податоците со кои располага ќе придонесе за разјаснување на прашањата кои овие денови се предмет на интерес на јавноста.

СООПШТЕНИЕ
Вторник, 26 Октомври 2010


Во врска со барањето на медиумите за информации поврзани со соработката на двајца словенечки експерти за односи со јавност со Кабинетот на поранешниот Претседател на Република Македонија г-дин Бранко Црвенковски во времето кога тој ја извршува таа функција, ја информираме јавноста за следното:



Кабинетот на Претседателот на Република Македонија д-р Ѓорге Иванов ги испитува сите законски можности документите поврзани со овој случај да и бидат достапни на јавноста согласно процедурите на Законот за пристап до информации од јавен карактер.


Она што можеме да го соопштиме во моментов е дека во архивата на Кабинетот на Претседателот на Република Македонија постои документација која се споменува во извештаите на медиумите и дека во нивната изработка учествувале повеќе стручни консултанти од Република Словенија.


По проверката на целокупниот предмет и утврдување на фактичката состојба јавноста ќе биде соодветно информирана.

Честитка по повод 23 октомври - Ден на македонската револуционерна борба
Сабота, 23 Октомври 2010

Претседателот на Република Македонија д-р Ѓорге Иванов по повод одбележувањето на државниот празник 23 октомври - Ден на македонската револуционерна борба упати честитка до граѓаните на Република Македонија.

Почитувани граѓани,

Денес со особена гордост и голема радост го прославуваме Денот на македонската револуционерна борба, одбележувајќи ја 117 годишнината од формирањето на македонската револуционерна организација со која започна организираната борба на македонскиот народ за слобода и создавање на своја независна држава.

Визијата на шестемина дејци основачи на организацијата беше инспирирана од слободарските идеали на целокупниот народ и оттука формирањето на македонската револуционерна организација беше со радост дочекана низ цела Македонија. Македонската револуционерна борба беше прифатена од севкупното граѓанство и таа не разликуваше етничка припадност што впрочем беше прокламирано и во Крушевскиот манифест.

Од формирањето на македонската револуционерна организација се до конечното ослободување и создавање на независна македонска држава се изоде долг и трнлив пат. Тој пат беше послан со страдање, крв и големо херојство. Саможртвата на генерации македонски херои остана аманет за идните генерации.

Денес кога живееме во слободна и независна Македонија ја имаме обврската и аманетот кон нашите херои да продолжиме по патот на развојот и напредокот, создавајќи модерна и просперитетна држава, рамноправен дел од светското семејство на народите.

Сплотени продолжуваме напред!
Нека е честит празникот,
Да живее Македонија!

д-р Ѓорге Иванов

Средба со претседателот на Владата на Црна Гора Мило Ѓукановиќ
Петок, 22 Октомври 2010

Претседателот на Република Македонија д-р Ѓорге Иванов денеска го прими претседателот на Владата на Црна Гора, г-дин Мило Ѓукановиќ.

На средбата беше констатирано искреното пријателство и високото ниво во односите меѓу двете земји, кои во континуитет бележат позитивен развој, за што потврдуваат и оваа посета на премиерот Ѓукановиќ на Република Македонија и претстојната посета на Претседателот Иванов на Црна Гора која ќе се реализира во почетокот на ноември оваа година.
Претседателот Иванов подвлече дека токму политичкиот дијалог, кој што е континуиран и се остварува на сите нивоа, претставува голем капитал кој во наредниот период треба да се зголемува, особено во сферата на економската соработка.

На средбата се разговараше и се истакна задоволството за денеска потпишаните билатерални спогодби со кои уште еднаш се потврди блиската соработка на двете земји како на економско поле, така и на полето на политичкиот дијалог.

Претседателот Иванов и премиерот Ѓукановиќ разменија мислења за понатамошна соработка и развивање на прашањата за соработка на регионален и мултилатерален план, соработката за НАТО и ЕУ интеграцијата на двете земји. Двајцата соговорници констатираа дека Македонија и Црна Гора, споделувајќи идентична визија за интеграцијата во евро-атлантските структури, се посветени на регионалната соработка и на градењето на добрососедски односи и во таа насока се согласија за натамошна взаемна поддршка во интегративните процеси.

Средба со Претседателот на Европскиот совет Херман Ван Ромпуј
Вторник, 19 Октомври 2010

Претседателот на Република Македонија д-р Ѓорге Иванов денеска го прими Претседателот на Европскиот совет Херман Ван Ромпуј.

На средбата се разговараше за односите меѓу Република Македонија и Европската Унија, за актуелностите во процесот кои се води под покровителство на ОН за разликите околу името, а беа разменети и мислења и информации за состојбите во рамките на Унијата како и состојбите во регионот на Југоисточна Европа.

Претседателот Иванов нагласи дека посетата на Претседателот на Европскиот совет Херман Ван Ромпуј претставува значаен сигнал на поддршка на проширувањето како една од најуспешните политики на ЕУ за ширење на областа на безбедност и просперитет во Европа.

Претседателот Иванов нагласи дека фокусот на Република Македонија останува на двата главни колосека: ефикасно спроведување на реформите и максимализирање на напорите за надминување на наметнатиот проблем со името под покровителство на ОН. Претседателот Иванов апелираше Република Македонија да има еднаков третман како други земји кандидати, потенцирајќи го успешниот пример на паралелно движење во интеграциите и во разрешувањето на билатералните проблеми помеѓу Република Словенија и Република Хрватска.

На интерес на соговорникот, претседателот Иванов ја елаборираше актуелната состојба во регионот и нагласи дека европската идеја е таа која ги движи сите општества кон просперитет и ги упатува сите земји во регионот кон  тесна соработка гледајќи едни на други како партнери и поддржувачи во овој историски проект.

Претседателот на Европскиот Совет Ромпуј изрази благодарност за мошне конструктивната и корисна размена на информации и видувања на наведените теми, а изрази  и задоволство од сериозните зафати во реформските процеси кои ги превзема Република Македонија кои се од суштинско значење за европската перспектива на земјата. Ромпуј нагласи дека неговата посета е со две клучни поенти да апелира за продолжување на напорите за изнаоѓање на заемно прифатливо решение за надминување на спорот со Грција и во тој контекст упати честитки и благодарност за ангажманот на претседателот Иванов. Претседателот на Европскиот совет  Ромпуј повика на продолжување на реформскиот процес и се заблагодари за улогата и активностите на претседателот Иванов во унапредувањето на регионалната соработка и добрососедските односи.

 
Почеток < Пред 141 142 143 144 145 146 147 148 149 150 Следно > Крај
Страница 148 од 154