Соопштенија
mnr_Turcija
Средба на претседателот Иванов со г. Мевлут Чавушоглу, министер за надворешни работи на Р. Турција
Недела, 18 Јуни 2017

Претседателот на Република Македонија, д-р Ѓорге Иванов, денеска го прими министерот за надворешни работи на Република Турција, г. Мевлут Чавушоглу.

На средбата, беше разговарано за натамошното продлабочување на билатералните односи и зголемување на соработката меѓу Република Македонија и Република Турција. Двајцата соговорници изразија задоволство од традиционалното пријателство и партнерство, како и од интензивната комуникација и соработка во сите сфери од заеднички интерес, кои се потврда за одличните односи меѓу Република Македонија и Република Турција.

Изразувајќи благодарност за цврстата и принципелна поддршка на Република Турција во однос на нашите стратешки цели, претседателот Иванов нагласи дека Република Македонија високо ја вреднува поддршката од Турција за употребата на уставното имe на Република Македонија и интеграцијата на земјата во НАТО.

„По решението на политичката криза време е да се создаде нов поттик за членството на Република Македонија во НАТО. Како и досега, ја очекуваме вашата отворена и гласна поддршка", истакна на средбата претседателот Иванов.

Министерот Чавушоглу ја реафирмираше поддршката што Република Турција ја дава на европските и евроатланските интеграции на Република Македонија, укажувајќи дека Република Турција ќе биде доследна на таа континуирана поддршка.

Македонскиот претседател и министерот Чавушоглу разменија мислења и информации за состојбите во регионот, за прашањата од надворешно политички интерес за двете земји, и за потребата од поголема соработка меѓу безбедносните служби на Република Македонија и Република Турција. Во таа насока, претседателот Иванов ја истакна потребата од размена на информации меѓу полициските служби и службите за разузнавање, преземање на заеднички акции, како и изнаоѓањето на ефективни средства и методи за превенција и борба против ширење на насилен екстремизам и тероризам.

Двајцата соговорници ја поздравија економската соработка, со очекување за нејзино натамошно интензивирање, како и плодната соработка на полето на одбраната. Претседателот Иванов се заблагодари за логистичката поддршка за опремување, едукација и обука на АРМ, како и за досегашната хуманитарна помош добиена од Република Труција.

PRMportret
Сочувство од претседателот Иванов по повод смртта на германскиот канцелар г. Хелмут Кол
Сабота, 17 Јуни 2017

Претседателот на Република Македонија, д-р Ѓорге Иванов, упати писмо со сочувство до претседателот на Сојузна Република Германија, г. Франк Валтер Штајнмаер, по повод смртта на поранешниот германски канцелар, г. Хелмут Кол.

Почитуван господине Претседателе,

Со длабоко желење ја примив веста за смртта на поранешниот германски канцелар, почитуваниот Хелмут Кол. Во овој тажен миг за Вас и за пријателскиот германски народ, дозволете ми, во мое лично име, како и во името на граѓаните на Република Македонија, да Ви ги упатам изразите на нашето искрено сочувство.

Хелмут Кол беше импозантна фигура во германската, европската и светската историја. Како голем државник и брилијантен политичар, канцеларот Кол ја препозна историската одговорност и покажа вистинско лидерство и непоколебливи напори и заложби во обединувањето на Германија.

Политичкото наследство на творецот на модерна Германија и промоторот на единствена Европа ќе остане длабоко врежано во меморијата на германската и европската историја и ќе продолжи да биде инспирација за новите генерации на политичари во Европа и светот. Република Македонија  и нејзините граѓани високо го ценеа и почитуваа канцеларот Кол и неизмерно остануваме благодарни за неговата улога во процесот на осамостојувањето и меѓународно етаблирање на нашата држава, на развојот на односите и меѓусебното почитување меѓу нашите пријателски држави и народи.

Ве молам господине Претседателе, изразите на длабоко сочувство да ги пренесете до семејството на канцеларот Кол.

д-р Ѓорге Иванов

PRMsocustvo
Писмо со сочувство до г. Хасан Рухани, Претседател на Исламска Република Иран
Четврток, 08 Јуни 2017

Претседателот на Република Македонија, д-р Ѓорге Иванов, по повод терористичките напади во Техеран, упати писмо со сочувство до г. Хасан Рухани, Претседател на Исламска Република Иран.

Ваша Екселенцијо,

Со згрозеност, вознемиреност и тага ја примив информацијата за ужасниот терористички чин кој се случи во Техеран и искрено жалам за загубените животи од оваа трагедија.

Нема соодветни зборови што ќе ја намалат Вашата и тагата на семејствата на настраданите, но дозволете ми во името на граѓаните на Република Македонија и во свое лично име да Ви упатам изрази на мое најискрено сочувство.

Терористичките закани можат да бидат поразени само со координиран, заеднички и бескомпромисен одговор. Затоа, сакам да Ве уверам дека одлучно го осудувам ова нечовечно злосторство и дека Република Македонија стои рамо до рамо со целата меѓународна заедница во борбата против тероризмот.

Ве молам, господине Претседателе, изразите на сочувство да ги пренесете до семејствата на трагично настраданите.

д-р Ѓорге Иванов

PRMsocustvo
Сочувство од Претседателот Иванов по повод терористичкиот напад во Лондон
Недела, 04 Јуни 2017

Претседателот на Република Македонија, д-р Ѓорге Иванов по повод терористичкиот напад во Лондон упати сочувство до Кралицата на Обединетото Кралство на Велика Британија и Северна Ирска, Н.В. Елизабета Втора.

Ваше Величество,

Со шок и огорченост ја примив веста за терористичкиот напад во Лондон, во кој животот го загубија голем број на невини лица и каде има голем број на повредени.

Во овие мигови на длабока тага, дозволете ми во име на граѓаните на Република Македонија, да изразам искрено сочувство и да Ве охрабрам во истрајноста и решителноста во борбата со насилството и злосторничките акти, без разлика од каде и од што се мотивирани.

Сакам да Ве уверам дека Република Македонија најостро ги осудува секакви терористички напади, кои шират страв и од кои никој и никаде не е безбеден,и силно ја поддржува Обединетото Кралство во решителната борба против тероризмот, како предуслов на патот кон мирот, стабилноста и напредокот.

Ваше Величество, нашите мисли и молитви се со Вас и со семејствата на жртвите.

д-р Ѓорге Иванов

Japonija
Предавање на акредитивни писма од страна на новоименуваните амбасадори на Јапонија и на Монголија
Вторник, 30 Мај 2017

Претседателот на Република Македонија, д-р Ѓорге Иванов, денеска ги прими акредитивните писма на новоименуваните амбасадори на Јапонија и Монголија за Република Македонија.

На средбата со г-ѓа Кеико Ханеда, прв резидентен амбасадор на Јапонија во Република Македонија, претседателот Иванов изрази големо задоволство од отворањето на амбасадата на Јапонија во Скопје што претставува уште една потврда за пријателството меѓу двете држави. „Сигурен сум дека Вашите активности како резидентен амбасадор на Јапонија во Република Македонија ќе придонесат за натамошно подобрување на нашите односи со внесување нови форми и содржини, пред сè на економски план, што ќе се одрази на зголемувањето на видливоста на Јапонија во Република Македонија и на започнувањето плодна економска соработка од која корист ќе имаат и јапонските компании и македонските граѓани", рече претседателот Иванов. Амбасадорката Кеида истакна дека Јапонија придава големо значење за стабилноста и просперитетот на Југоисточна Европа каде што стабилниот развој на Република Македонија има значајна улога, додавајќи дека Јапонија е голем поддржувач на нашата земја за интеграција во евроатлантските структури.

MongolijaНа предавањето на акредитивните писма од страна на Н.Е. г. Дашјамц Батсаикхан, амбасадор на Монголија за Република Македонија, со седиште во Софија, македонскиот претседател рече дека и покрај географската оддалеченост на двете пријателски земји, постои заедничка желба и голем потенцијал за посѐопфатно унапредување на меѓусебните односи за доброто на двата народи. Амбасадорот Батсаикхан истакна дека во наредниот период ќе сe посвети на промовирање на постоечките пријателски односи и на унапредување на билатералната соработка меѓу двете земји.

Претседателот Иванов на двајцата амбасадори им посака успешно извршување на одговорната дипломатска функција и им изрази поддршка во вршењето на должноста.

EU_ambasadori
Средба на претседателот Иванов со амбасадорите на земјите членки на ЕУ во Република Македонија
Понеделник, 29 Мај 2017

Претседателот на Република Македонија, д-р Ѓорге Иванов, денеска одржа работна средба со амбасадорите на земјите членки на Европската Унија во Република Македонија.

На средбата беа разменети мислења за актуелните случувања во Република Македонија, по определувањето на мандат за состав на Владата на Република Македонија.

Претседателот Иванов ја реафирмираше посветеноста на Република Македонија за почеток на пристапни преговори со ЕУ, како еден од највисоките стратешки приоритети.

Според претседателот Иванов, потребно е Европската унија да направи исчекор и да определи датум за почеток на пристапните преговори со Република Македонија, односно да овозможи отворање на поглавјата 23 и 24.

„Отворањето на преговорите во поглавјата 23 и 24 за правосудство, основните права, правда, слобода и безбедност ќе го дадат неопходниот поттик за интензивирање на реформските процеси. Статус квото не смее да продолжи. Нам ни е неопходна трансформирачката моќ на пристапниот процес, како и обединувачката моќ на процесот, за соочување со длабоката политичка поларизација во земјата", рече претседателот Иванов на средбата.

Претседателот Иванов ја повтори потребата лидерите на парламентарните партии да покажат одговорност и да ја обноват посветеноста за европска и за евроатлантска Македонија, а приоритет да се даде на закони и решенија од европската агенда.

Амбасадорите на земјите членки на Европската Унија ја поздравија одлуката на претседателот Иванов за доделување на мандат за состав на Влада на Република Македонија, со што се отвора можноста за нормализација на состојбите и политичка стабилност во земјата. На средбата беше истакнато взаемното очекување новата влада во своите приоритети да ја има ЕУ агендата, односно реформите кои ќе ја забрзаат интеграцијата на Република Македонија во ЕУ.

На средбата беа разменети мислења и информации за клучните предизвици со кои се соочува Република Македонија и целиот регион, како што се мигрантската и безбедносна криза, екстремниот радикализам, растечката националистичка реторика во регионот.

На нивен интерес, претседателот Иванов ги запозна амбасадорите со клучните аспекти од неговите неодамнешни посети на Кралството Јордан, Руската Федерација и Државата Ватикан, како и за претстојните учества на самитот Брдо-Бриони и на самитот на Процесот за соработка во југоисточна Европа.

Амбасадорите на земјите членки на Европската унија истакнаа дека високо го ценат отворениот пристап од претседателот Иванов и изразија уверување дека Европската унија е подготвена да се ангажира Република Македонија и целиот регион да биде високо на агендата во институциите на ЕУ.

 
Почеток < Пред 1 2 3 4 5 6 7 8 9 10 Следно > Крај
Страница 9 од 154