Соопштенија
akreditivi_danska_7
Предавање на акредитивни писма од страна на новоименуваните амбасадори на Кралството Данска, на Големото Војводство Луксембург и на Обединетата Република Танзанија
Вторник, 27 Март 2018

Претседателот на Република Македонија, д-р Ѓорге Иванов денеска ги прими акредитивните писма на новоименуваните амбасадори на Кралството Данска, на Големото Војводство Луксембург и на Обединетата Република Танзанија во Република Македонија.

На средбата со новоименуваниот амбасадор на Кралството Данска за Република Македонија со седиште во Белград, Н.Е. г. Андерс Кристиан Хаугард, претседателот Иванов изрази задоволство од успешниот развој на македонско - данските односи и на соработката во разни области од заемен интерес.

Претседателот Иванов се заблагодари за досегашната поддршка и помош од Кралството Данска во однос на македонската евроатланска интеграција, изразувајќи убедување дека истата ќе продолжи и во иднина. Амбасадорот на Кралството Данска, г. Хаугард изрази подготвеност за зацврстување на досегашните одлични односи со македонскиот народ преку унапредување на соработката во повеќе области.

akreditivi_luksemburg_7На средбата со новоименуваниот амбасадор на Големото Војводство Луксембург за Република Македонија со седиште во Луксембург, Н.Е. г. Кристиан Бивер, двајцата соговорници разговараа за можностите за унапредување на економската соработка и трговската размена меѓу двете држави, како и за динамизирање на севкупните билатерални односи и соработка.

Претседателот Иванов изрази уверување дека европската и евроатлантската интеграциска определба и во иднина ќе преставува силен мост на поврзување во односите меѓу Република Македонија и Големото Војводство Луксембург. Во таа насока амбасадорот на Големото Војводство Луксембург, г. Бивер истакна дека неговата земја силно го поддржува патот на нашата држава кон евроатлантската заедница.

akreditivi_tanzanija_7

На средбата со новоименуваниот амбасадор на Обединетата Република Танзанија со седиште во Рим, Н.Е. г. Џорџ Кахема Мадафа, претседателот Иванов истакна дека и покрај географската оддалеченост меѓу двете земји, постојат можности за развој и унапредување на севкупните односи. Двајцата соговорници разменија мислења за регионални и глобални прашања, како и за изнаоѓање на најприфатливи форми за билатерална економска соработка.

Претседателот Иванов на новоименуваните амбасадори им посака успех во вршењето на одговорната дипломатска должност.

PRMsocustvo
Сочувство до Претседателот на Руската Федерација, г. Владимир Путин
Понеделник, 26 Март 2018

Претседателот на Република Македонија, д-р Ѓорге Иванов упати писмо со сочувство до Претседателот на Руската Федерација, г. Владимир Путин, по повод пожарот во сибирскиот град Кемерево.

Почитуван господине Претседателе,

Со големо жалење ја примив веста за пожарот кој изби во трговскиот центар во сибирскиот град Кемеровo и предизвика вистинска трагедија во Вашата земја. Искрено жалам за загубените животи, за човечките страдања и штетите предизвикани од оваа ужасна трагедија.

Екселенцијо, нема соодветни зборови кои ќе ја намалат Вашата и тагата на граѓаните на Русија, но дозволете ми во овие тажни моменти за Вас, од името на граѓаните на Република Македонија и од свое лично име, да Ви упатам изрази на најискрено и длабоко сочувство.

Ве молам, Ваша Екселенцијо, изразите на најискрено сочувство да ги пренесете до семејствата на трагично настраданите и до целиот пријателски народ на Руската Федерација, а на повредените да им пренесете желби за брзо закрепнување.

д-р Ѓорге Иванов


PBKweb_1
Средба на претседателот Иванов со делегација на Политичкo безбедносниот комитет на Европската унија
Четврток, 22 Март 2018

Претседателот на Република Македонија, д-р Ѓорге Иванов, денеска прими делегација на Политичкo безбедносниот комитет на Европската унија, подготвително тело на Советот на Европската унија, составено од претставници на министерствата за надворешни работи на земјите членки во Брисел.

На средбата беа разменети мислења за аспирациите на Република Македонија за членство во Европската унија, актуелните состојби во регионот, особено во контекст на заканите од илегална миграција, борбата против тероризмот и радикализмот, и кризниот менаџмент.

На средбата претседателот Иванов истакна дека е потребен единствен и координиран одговор на заканите но и развој на превентивен механизам во борбата против насилниот екстремизам и радикализам и странските терористички борци, а државите од Западен Балкан да се интегрираат во архитектурата на безбедносниот систем на ЕУ со непречен пристап до сите бази на податоци.

Според претедателот Иванов, ниту една земја од регионот нема капацитет самостојно да се справи со илегалната миграција и посочи на потребата од соодветна европска стратегија поддржана со финансиска помош, што е од витално значење за регионалната стабилност. Во тој контекст, претседателот Иванов го истакна значењето на помошта на земјите од Вишеградската група, преку присуството на нивни полициски службеници на северната и јужната граница.

На средбата беше искажан интерес за дефинирање на правна рамка за партнерство со Унијата во однос на заштита на границите, контратероризмот и кризниот менаџмент.

Претседателот Иванов на средбата рече дека интеграцијата во Европската Унија останува еден од основните надворешно - политички приоритети на Република Македонија. Според претседателот Иванов, отворањето на пристапните преговори со Европската унија ќе даде силен импулс за натамошна трансформација на македонското општество и ќе биде најдобар одговор пред предизвиците со кои се соочува земјата.

PBKweb_2

Putin
Честитка до г. Владимир Путин по повод повторниот избор на функцијата Претседател на Руската Федерација
Вторник, 20 Март 2018

Претседателот на Република Македонија, д-р Ѓорге Иванов, упати честитка до Н.Е. г. Владимир Путин по повод повторниот избор на функцијата Претседател на Руската Федерација.

Почитуван господине Претседател,

По повод Вашиот реизбор на функцијата Претседател на Руската Федерација, дозволете ми од името на граѓаните на Република Македонија и од мое лично име да Ви упатам најискрени честитки и да Ви посакам многу успех во продолжувањето на извршувањето на важните и одговорни должности на оваа позиција.

Ја користам оваа свечена пригода, уште еднаш, да го изразам задоволството од досегашниот успешен развој на билатералните односи и од соработката меѓу Република Македонија и Руската Федерација за што и Вие имате несомнена заслуга. Духовната и културната традиција меѓу нашите народи се добар потенцијал за соработка што стана реалност благодарение на долгогодишните заложби и посветеност на властите од двете земји.

Убеден сум дека односите и во иднина ќе продолжат да се развиваат во духот на воспоставеното пријателство, меѓусебното разбирање и заемното почитување. Верувам дека со заемни ангажмани и во наредниот период ќе продолжи да јакне севкупната соработка меѓу Република Македонија и Руската Федерација во сите сфери од заемен интерес, посебно во економскиот и енергетскиот сектор, културата и туризмот.

Повторувајќи ги моите срдечни честитки и желби за натамошна успешна работа и лична среќа, Ве молам, господине Претседателе, примете ги изразите на моето највисоко почитување.

д-р Ѓорге Иванов

XiJinping
Честитка до г. Си Џинпинг по повод повторниот избор на функцијата Претседател на Народна Република Кина
Вторник, 20 Март 2018

Претседателот на Република Македонија, д-р Ѓорге Иванов, упати честитка до Н.Е. г. Си Џинпинг по повод повторниот избор на функцијата Претседател на Народна Република Кина.

Почитуван господине Претседател,

Ми причинува особено задоволство, од името на граѓаните на Република Македонија, да Ви го честитам успешното одржување на 13-тиот Национален конгрес на Народна Република Кина, донесувањето на новиот Устав и Вашиот повторен избор за претседател.

Дозволете да го изразам моето длабоко почитување за Вашето досегашно успешно и мудро водство на Народна Република Кина, која е една од водечките економии во светот и исклучително важен фактор во меѓународната политка. Верувам дека со Вашето натамошно водство Кина ќе продолжи да се развива по зацртаниот пат на „социјализмот со кинески карактеристики" и остварувањето на „кинескиот сон".

Ви посакувам успех во натамошната реализација на Вашата визија за препородот на Кина и за иницијативите „Еден појас, еден пат" и „16+1". Република Македонија смета дека овие иницијативи придонесуваат кон мирот, просперитетот, отвореноста, иновацијата и поврзувањето меѓу цивилизациите, а врз принципите на соработката и почитувањето на територијалниот, политичкиот и културниот интегритет. Помагајќи во градењето на нова инфраструктура, Народна Република Кина придонесува да се менува географијата, а со тоа и иднината.

Убеден сум, Ваша Екселенцијо, дека со заеднички заложби ќе дадеме свој придонес за натамошно унапредување на севкупните, традиционално пријателски односи меѓу Република Македонија и Народна Република Кина, кои оваа година одбележуваат 25-годишнина од воспоставувањето на дипломатските односи. Постои уште неискористен потенцијал за соработка на полето на економијата, енергетиката, инфраструктурата, информатичките технологии, образованието, туризмот и културата воопшто.

Со искрени желби за Ваша натамошна успешна работа, лична среќа и добро здравје, Ви ги упатувам, почитуван Претседателе, изразите на моето високо почитување.

д-р Ѓорге Иванов

MNR_HRVATSKA
Средба со г-а Марија Пејчиновиќ Буриќ, заменик претседател на Владата и Министер за надворешни и европски работи на Република Хрватска
Вторник, 13 Март 2018

Претседателот на Република Македонија, д-р Ѓорге Иванов, денеска ја прими г-а Марија Пејчиновиќ Буриќ, заменик претседател на Владата и Министер за надворешни и европски работи на Република Хрватска.

Двајцата соговорници констатираа дека двете земји имаат пријателски односи со висок степен на меѓусебна доверба и заеднички заложби за унапредување на регионалната соработка, мир и стабилност во регионот.

На средбата беа разменети мислења за натамошно продлабочување на билатералните односи меѓу двете земји, како и за актуелните состојби во однос на исполнување на стратешките цели на Република Македонија за членство во ЕУ и НАТО.

Претседателот Иванов се заблагодари за отворената поддршка од Република Хрватска за евроинтеграцискиот процес на Република Македонија и оцени дека новата Стратегија за проширување на Европската комисија е позитивен сигнал за преземање на одлучувачки чекори за Република Македонија и определување на датум за почеток на преговори за членство на Советот на ЕУ во јуни. Во таа насока, претседателот Иванов се заблагодари за конструктивниот став на Хрватска дека билатералните спорови не треба да бидат пречка кон евроатлантскиот пат.

Македонскиот претседател посочи дека двете земји треба да се фокусираат на проекти од значење за економскиот развој и изрази очекување дека успешната и континуирана соработка во одбраната, како и соработката за справување со мигрантската криза, ќе продолжат и во иднина.

Во насока на интензивирање на политичкиот дијалог на највисоко ниво, претседателот Иванов изрази задоволство од претстојната официјална посета на претседателот на Република Хрватска, г-а Колинда Грабар Китаровиќ на Република Македонија и нејзиното учество на состанокот на лидерите на Процесот Брдо-Бриони, што ќе се одржи на 28 април во Скопје. Процесот Брдо-Бриони, потенцираше претседателот Иванов, е конкретна потврда за посветеноста на Хрватска кон јакнење на регионалната соработка и поддршката на евроатлантските интеграции за земјите од регионот.

 
Почеток < Пред 1 2 3 4 5 6 7 8 9 10 Следно > Крај
Страница 6 од 163