Соопштенија
PRM_Glover
Средба со шефот на Мисијата на ОБСЕ/ОДИХР за набљудување на локалните избори во Р. Македонија, г-ѓа Одри Гловер
Петок, 22 Септември 2017

Претседателот на Република Македонија, д-р Ѓорге Иванов, денеска оствари средба со амбасадорот  г-ѓа Одри Гловер, шеф на Мисијата на ОБСЕ/ОДИХР за набљудување на локалните избори во Република Македонија.

На средбата, претседателот Иванов истакна дека сите институции инволвирани во изборниот процес, вклучително и политички партии треба да придонесат во спроведувањето на фер и демократски избори, преку безусловно почитување на законските прописи и во согласност со достигнатите демократски придобивки и европските стандарди, водејќи сметка за државните и за интересите на граѓаните.

„Очекувам, како и секогаш досега, изборниот процес да помине во најдобар ред и во демократска атмосфера, но морам да истакнам дека сите учесници во изборниот процес носат политичка одговорност и должност да ги почитуваат изборните правила и закони", потеницираше претседателот Иванов.

Посочувајќи дека спроведувањето на изборниот процес е еден од клучните критериуми за исполнување на стратешките цели на Република Македонија, претседателот Иванов изрази очекување дека изборниот натпревар ќе биде регуларен и конструктивен и ќе претставува борба на предлози и идеи, а не само борба за локална власт.

Шефот на набљудувачката мисија на ОБСЕ го запозна претседателот Иванов со нивните претстојни активности поврзани со изборниот процес.Македонскиот претседател изрази очекување дека набљудувачката мисија на ОБСЕ/ОДИХР, како и досега, професионално ќе ја извршува својата задача во рамките на својот строго утврден мандат.

PRM_socustvo
Сочувство од претседателот Иванов по повод катастрофалниот земјотрес во Мексико
Среда, 20 Септември 2017

Претседателот на Република Македонија, д-р Ѓорге Иванов, упати писмо со сочувство до претседателот на Соединетите Мексикански Држави, г. Енрике Пења Нието, по повод катастрофалниот земјотрес во централниот дел на Мексико.

Почитуван господине Претседател,

Со големо жалење ги примив вестите за катастрофалниот земјотрес и длабоко жалам за загубените животи, за човечките страдања и големите штети од оваа катастрофа.

Нема соодветни зборови кои ќе ја намалат Вашата, и тагата на граѓаните на Соединетите Мексикански Држави, но дозволете ми во името на граѓаните на Република Македонија и во свое лично име да Ви упатам изрази на мое најискрено сочувство. Сигурен сум, господине Претседател, дека со Вашето лидерство, Соединетите Мексикански Држави брзо ќе ги надминат последиците од оваа природна катастрофа.

Примете ги, Ваша Екселенцијо, изразите на моето највисоко почитување.

д-р Ѓорге Иванов

PRM_n_portret
Честитка од претседателот Иванов по повод еврејскиот празник Рош Хашана
Среда, 20 Септември 2017

Претседателот на Република Македонија, д-р Ѓорге Иванов, по повод големиот еврејски празник Рош Хашана, односно започнувањето на еврејската Нова година, упати честитка до претседателот на Еврејската заедница во Република Македонија, г-ѓа Берта Романо-Николиќ и до припадниците на Еврејската заедница во Република Македонија.

Почитувана г-ѓo Романо-Николиќ,

Ми претставува чест и задоволство, Вам и на сите припадници на Еврејската заедница во Република Македонија да Ви го честитам големиот празник Рош Хашана.

Еврејската нова година значи нов почеток и нова надеж дека во годината што следи ќе нè одминат тагата, неприликите и предизвиците, а ќе ни наминат радоста, успехот и благосостојбата. Рош Хашана е време на благодарност за Божјите благослови, но и период за размислување за Божјите закони. Бидејќи, како што пишува псалмистот Давид, благословени се токму оние кои ги почитуваат божјите закони. Еден од тие закони, кој е истовремено и темел врз кој треба да се градат општеството и државата, е да ги сакаме ближните како самите себе.

Честитајќи Ви го прославувањето на Новата година, го посакувам следново: почитувајќи ги културните и религиските разлики да продолжиме и понатаму заеднички да ја градиме нашата држава Република Македонија.

Шана Това

д-р Ѓорге Иванов

VT_5
Средба со генерал-мајор Стивен Креј, командант на Националната гарда на Вермонт
Четврток, 14 Септември 2017

Претседателот на Република Македонија, д-р Ѓорге Иванов, денеска го прими генерал-мајор Стивен Креј, командант на Националната гарда на сојузната држава на Соединетите Американски Држави, Вермонт, кој престојува во посета на Република Македонија.

На средбата беа разменети мислења за долгогодишната плодна соработка меѓу Армијата на Република Македонија и Националната гарда на Вермонт преку заедничкото учество во мировни мисии, реализацијата на заеднички вежби, обука и едукација на припадниците на двете армии.

Претседателот Иванов го поздрави стратешкото партнерство на Армијата на Република Македонија со Националната гарда на Вермонт изразувајќи уверување дека успешната соработка со оваа сојузна држава во делот на одбраната претставува можност за проширување на соработката и во други области од заемен интерес.

Македонскиот претседател истакна дека Република Македонија ги исполнува сите услови и критериуми за членство во НАТО алијансата, а со учеството во мировните мисии де факто се однесува како членка на северно-атлантската организација,  и во тој контекст изрази очекување за натамошна интензивна американска поддршка, со цел Република Македонија да го заземе заслуженото место во НАТО.

Генерал-мајор Креј оддаде признание за севкупниот ангажман на македонските војници во меѓународните мировни мисии, и додаде дека САД како и досега ќе продолжи да биде поддржувач на стратешката определба на Република Македонија за целосна интеграција во евроатлантските структури.

Во 2012 година претседателот Иванов ја одликуваше Националната гарда на Вермонт со Орден за воени заслуги.

PRMportret
Честитки до претседателот Иванов по повод 8 Септември - Денот на независноста
Среда, 13 Септември 2017

По повод празникот 8 Септември, Денот на независноста на Република Македонија, до претседателот на Република Македонија, д-р Ѓорге Иванов, беа упатени писма со честитки од голем број шефови на држави од светот.

Претседателот на Соединетите Американски Држави, г. Доналд Трамп, во името на американскиот народ упати честитка до претседателот Иванов и до македонскиот народ.

„Соединетите Држави 26 години се цврст пријател и партнер на Македонија. Ние сме определени за поддршка на вашите напори за реформи, со цел земјата повторно да се врати на патеките кон членството во НАТО и Европската Унија. Демократска, безбедна, просперитетна и инклузивна Македонија со силни трансатлантски врски, останува наша заедничка цел", стои во писмото од американскиот претседател Трамп, кој истовремено изразува очекување за натамошно јакнење на заедничкото партнерство.

Во писмото испратено од Претседателот на Народна Република Кина, г. Си Џипинг се вели: „Односите меѓу Кина и Македонија се традиционално пријателски со солидна основа за билатерално пријателство и соработка. Придавам голема важност на развојот на односите меѓу двете земји и подготвен сум да соработуваме, во насока на промовирање нов развој на односите меѓу Кина и Македонија во корист на двете земји и двата народа".

Честитка по повод Денот на независноста упати и Генералниот гувернер на Канада „Канада високо ги вреднува билатералните односи со Република Македонија и го охрабрува нивното продлабочување во насока на заедничките евроатлански вредности. И натаму ќе ги поддржуваме вашите напори кон силна и стабилна демократија како и вашите аспирации за членство во НАТО и ЕУ" , стои во честитката од канадскиот гувернер, г. Дејвид Џонстон. 

Во пораката од Кралицата на Обединетото Кралство на Велика Британија, Н.В. Елизабета ǁ се вели: „Ваша Екселенцијо, ми претставува посебно задоволство да Ви го честитам државниот празник, Денот на независноста, со најискрени желби и честитки за среќа и просперитет на Владата и народот на Република Македонија".

Честитка до претседателот Иванов со желби за здравје и просперитет на Република Македонија упати и претседателот на Швајцарската Конфедерација, г-ѓа Дорис Лојтхарт. „Убедена сум дека заедничката доверба и пријателството меѓу двете земји ќе се продлабочи во годините што следат", се вели во честитката од Швајцарската Конфедерација.

Писмо до претседателот Иванов по повод Денот на независноста упати и претседателот на Чешката Република, г. Милош Земан. „Цврсто верувам дека взаемното разбирање и пријателство меѓу двете земји ќе продолжи да се развива и во иднина, во интерес на натамошно јакнење на нашата заедничка соработка", стои во честитката од претседателот Земан.

Честитки во името на граѓаните на Словачката Република упати претседателот на Словачката Република, г. Андреј Киска.

„Верувам дека блиските односи меѓу нашите земји ќе продолжат да се развиваат во корист на нашите граѓани. Словачката Република е подготвена да продолжи да и помага на Македонија на патот кон ЕУ и НАТО" порачува словачкиот претседател.

Во честитката упатена од бугарскиот претседател, г. Румен Радев, се изразува задоволство што Република Бугарија е првата држава која ја призна независноста на Република Македонија. „Убеден сум дека со потпишување на Договорот за пријателство, добрососедство и соработка, ќе отвориме нова страница во нашите билатерални односи, кои ќе се развиваат и продлабочуваат во сите сфери од заеднички интерес. Верувам дека во овој значаен момент за нас и целиот регион, интензивирањето на контактите меѓу институциите на двете земји, ќе даде активен придонесе за доброто на нашите граѓани, како и за мирот и стабилноста на Југоисточна Европа", порачува бугарскиот претседател Радев во писмото до претседателот Иванов.

Во писмото упатено од претседателот на Република Грција г. Прокопиос Павлопулос се вели: „Верувам дека нашите две соседни земји треба да продолжат да работат заедно за да ја зајакнат својата билатерална соработка и односи во сите области од заеднички интерес, вклучувајќи ги мерките за градење доверба, процес кој би можел да ги олесни напорите за постигнување на заемно прифатливо решение за името, почитувајќи ја историската вистина.

Уверен сум дека со заеднички напори ќе продолжиме да ги унапредуваме севкупните односи и соработка на нашите две земји, во интерес на мирот стабилноста и економскиот просперитет на нашите народи, како и на целиот регион", порачува претседателот на Република Србија г. Александар Вучиќ во својата честитка до претседателот Иванов, по повод Националниот празник.

Имам чест да ја реафирмирам поддршката од Романија на активните напори на Република Македонија за европска и евроатланска интеграција, се вели во писмото упатено до претседателот на Романија, г. Клаус Вернер Јоханис.„Ве убедувам во отвореноста и интересот на Романија за натамошно развивање на билатералните односи, во взаемен интерес на нашите народи и целиот регион на Југоисточна Европа", пишува претседателот на Романија во честитката до македонскиот претседател.

По повод Националниот празник желби за здравје и среќа упати претседателот на Република Турција г. Реџеп Тајип Ердоган. „Уверен сум дека Македонија како земја во којашто различните етнички  и верски групи живеат во обострана почит, нејзиното сплотување со Евроатлантските структури ќе биде придонес кон зачувувањето на мирот и слогата, не само во вашата земја туку и на целиот Балкан и сакам да подвлечам дека ќе продолжиме со својата поддршка кон интегрирањето на република Македонија во НАТО и ЕУ“, се вели во писмото на претседателот Ердоган.


Денот на независноста, го честита и претседателот на Република Латвија, г. Рајмонд Вејонис. „ Цврсто верувам дека одличните односи меѓу Латвија и Македонија, во иднина ќе продолжат да се развиваат и прдлабочуваат", стои во писмото упатено од латвискиот претседател.

Честитка до претседателот Иванов по повод Денот на независноста упати г-ѓа Керсти Калјулeид, претседател на Република Естонија. „Сигурна сум дека добрите односи и соработка меѓу нашите земји ќе продолжат да се интензивираат и во иднина“, се вели во писмото на  г-ѓа Калјулаид.

Желби за среќа и просперитет на граѓаните на Република Македонија во честитките до претседателот Иванов, изразиja императорот на Јапонија, Н.В. Акихито, Кралот на Белгијците Н.В. Филип, претседателот на Португалската Република г. Марчело Ребело де Суза, кралот на Холандија Н.В. Вилем-Александар, г. Енрике Пења Нието претседател на Соединетите Мексикански Држави

По повод 8 Септември честитки до претседателот Иванов со желби за продлабочување ан билатералните односи, и натамошен прогрес и просперитет на Република Македонија упати и претседателот на Казахстан, г. Нурсултан Назарбаев, како и Емирот на Државата Катар, Тамим Бин Хамад Ал-тани.

slovenija
Средба на претседателот Иванов со д-р Милан Брглез, претседател на Државниот збор на Република Словенија
Вторник, 12 Септември 2017

Претседателот на Република Македонија, д-р Ѓорге Иванов, денеска го прими д-р Милан Брглез, претседател на Државниот збор на Република Словенија, кој престојува во посета на Република Македонија.

На средбата беа разменети мислења за севкупните билатерални односи меѓу Република Македонија и Република Словенија, вклучувајќи ја соработката на парламентарно ниво, при што беше констатирано дека во континуитет двете земји негуваат пријателски односи, без отворени прашања, базирани на долгогодишна конструктивна соработка и заемна поддршка на билатерален и мултилатерален план.

Претседателот Иванов изрази задоволство од добрата динамика на политичкиот дијалог меѓу двете земји и континуираната реализација на средби на високо ниво.

На средбата претседателот Иванов изрази благодарност за континуираната и принципиелна поддршка од Република Словенија за аспирациите на Република Македонија за членство во Европската Унија и во НАТО, како и за поддршката во однос на бегалската и мигрантската криза. Претседателот Иванов изрази очекувања дека и во периодот што следи ќе продолжи соработката меѓу двете земји на планот на европските и евроатланските интеграции на Република Македонија, во рамки на Брдо Бриони Процесот, Процесот за соработка во југоисточна Европа и останатите регионални иницијативи.

Во разговорите беше посочена потребата за продлабочување на економската соработка и зголемување на трговската размена меѓу двете земји, за што беше констатирано дека постои голем потенцијал.

Двајцата соговорници разменија мислења за актуелните случувања во регионот и во Европа, особено во контекст на безбедноста и ја констатираа потребата од засилена соработка со цел да се обезбеди мирот и сигурноста во регионот.

 
Почеток < Пред 1 2 3 4 5 6 7 8 9 10 Следно > Крај
Страница 1 од 150