Соопштенија
PRM_socustvo
Писмо со сочувство до Претседателот на Република Грција, г. Прокопис Павлопулос, по повод катастрофалните поплави
Четврток, 16 Ноември 2017
3x4
Средба со градоначалникот на Солун, г. Јанис Бутарис
Четврток, 16 Ноември 2017

Претседателот на Република Македонија, д-р Ѓорге Иванов, денеска го прими градоначалникот на Солун, г. Јанис Бутарис

Изразувајќи задоволство од можноста за повторна средба, претседателот Иванов оцени дека и покрај отвореното билатерално прашање, соработката меѓу македонското и грчкото општество е на завидно ниво и посочи на потребата од нејзино натамошно унапредување.

„Република Македонија е подготвена за натамошно јакнење на соработката во сите сфери од заемен интерес кои ќе придонесат за нашата заедничка визија за регионална стабилност и просперитет, како и за заедничка сегашност и иднина во големото европско и евроатлантско семејство", рече претседателот Иванов на средбата.

Претседателот Иванов го поздрави интензивирањето на дијалогот и напорите на двете земји за забрзување на процесот на имплементација на мерките за градење доверба и внесување на нови содржини во билатералната соработка.

Според претседателот Иванов, од особено значење е натамошното продлабочување на економската соработка, усогласувањето и унапредувањето на правната рамка во интерес на бизнис заедниците од двете земји, како и потребата за натамошно инфраструктурно поврзување, преку ревитализација на железничката мрежа и отворање на нови гранични премини. Двајцата соговорници разменија мислења околу можностите за развој на проектот Вардар – Морава – Дунав, што ќе придонесе за отворање на нови можности за економиите, нови инвестиции и работни места.

Двајцата соговорници ги потенцираа доделувањето на стипендиите „Борис Трајковски" на Сити Колеџот од Солун и Школата за млади лидери, на која минатата година одржа предавање и градоначалникот на Солун, г. Бутарис, како успешни примери за унапредување на соработката меѓу Република Македонија и Република Грција.

Претседателот Иванов и градоначалникот Бутарис разменија мислења за актуелните состојби на економски и политички план во Република Македонија и во Република Грција.

PRM_portret_nov
Честитка од претседателот Иванов по повод реизборот на г. Борут Пахор на функцијата Претседател
Понеделник, 13 Ноември 2017

Претседателот на Република Македонија, д-р Ѓорге Иванов, упати честитка до г. Борут Пахор по повод реизборот на функцијата претседател на Република Словенија.

Почитуван господине Претседателe,

Mи причинува особена чест и големо задоволство да Ви го честитам реизборот на функцијата претседател на Република Словенија и да Ви упатам најискрени желби за натамошно успешно извршување на оваа одговорна функција.

Сакам и во оваа пригода да искажам задоволство од развојот на односите и соработката меѓу нашите две држави. Истовремено ценам дека постои потенцијал за уште поплодна соработка, кој со заемен ангажман може да се искористи.

Убеден сум дека Република Словенија знае да ги цени напорите и постигнувањата на Република Македонија во процесот на нејзиното интегрирање во НАТО и во Европската Унија, и верувам дека поддршката од Вашата земја за соодветна валоризација на тие постигнувања и натаму ќе продолжи.

Со такво убедување и со искрени желби за Ваша натамошна успешна работа, лична среќа и добро здравје, Ви ги упатувам, почитуван колега, изразите на моето највисоко почитување.

д-р Ѓорге Иванов

PRM_socustvo
Сочувство од претседателот Иванов по повод катастрофалниот земјотрес во Иран
Понеделник, 13 Ноември 2017

Претседателот на Република Македонија, д-р Ѓорге Иванов, упати сочувство до г. Хассан Рухани, претседател на Исламска Република Иран, по повод катастрофалниот земјотрес.

Почитуван господине Претседателе,

Со големо жалење ги примив вестите за катастрофалниот земјотрес и длабоко жалам за загубените животи, за човечките страдања и големите штети од оваа катастрофа.

Нема соодветни зборови кои ќе ја намалат Вашата и тагата на граѓаните на Исламската Република Иран, но дозволете ми во името на граѓаните на Република Македонија и во свое лично име да Ви упатам изрази на мое најискрено сочувство. Сигурен сум, господине Претседател, дека со Вашето лидерство Исламската Република Иран брзо ќе ги надмине последиците од оваа природна катастрофа.

Примете ги, Ваша Екселенцијо, изразите на моето највисоко почитување.

д-р Ѓорге Иванов

MNR_Crna_Gora_PRM_1
Средба на претседателот Иванов со министерот за надворешни работи на Црна Гора, г. Срѓан Дармановиќ
Четврток, 09 Ноември 2017

Претседателот на Република Македонија, д-р Ѓорге Иванов, денеска оствари средба со министерот за надворешни работи на Црна Гора, г. Срѓан Дармановиќ.

Двајцата соговорници изразија интерес за унапредување на севкупните билатерални односи меѓу двете земји и го поздравија континуираниот политички дијалог што укажува на традиционално пријателските односи меѓу Република Македонија и Црна Гора.

Претседателот Иванов и министерот Дармановиќ се согласија дека двете земји имаат идентични надворешно-политички цели и треба да се фокусираат на нивна реализација преку интензивна меѓусебна соработка на билатерален и регионален план.

Во однос на европската перспектива, претседателот Иванов посочи дека членството на Република Македонија во ЕУ и НАТО е од клучно значење за стабилноста и просперитетот на целиот регион и го нагласи интересот за интензивирање на политичко-безбедносната соработка со Црна Гора во контекст на НАТО.

„Евроинтеграцијата на државите од Западен Балкан е од суштинско значење за регионалната стабилност и развој. Потребна е јасна перспектива за приклучување кон ЕУ и силна поддршка за забрзување на НАТО интеграцијата на Република Македонија", порача на средбата претседателот Иванов.

Во тој контекст претседателот Иванов го поздрави позитивниот извештај на Европската комисија и охрабрувачките пораки од високи претставници на ЕУ во однос на лојалноста на Црна Гора во зачувувањето на заедничките европски вредности.

Министерот за надворешни работи, г. Срѓан Дармановиќ, истакна дека еден од приоритетите на Црна Гора, како иден претседавач со Јадранската Повелба, ќе биде поддршка за НАТО интеграциите на Република Македонија.

Претседателот Иванов и министерот за надворешни работи разменија мислења за актуелните политички случувања во Република Македонија и Црна Гора, како и за состојбите во регионот и Европа.

Двајцата соговорници го потврдија интересот за продолжување на тесната соработка во рамки на регионалните иницијативи и разменија информации за претстојниот Самит на Процесот Брдо-Бриони, чиј домаќин идната година е Република Македонија. Со цел унапредување на регионалната и економската соработка, беше потенцирана потребата од зголемени инвестиции во инфраструктурно поврзување на земјите од регионот.

PRMportret2
Честитка по повод 23 Октомври, Денот на Mакедонската револуционерна борба
Понеделник, 23 Октомври 2017

Претседателот на Република Македонија, д-р Ѓорге Иванов, по повод одбележувањето на државниот празник 23 Октомври - Денот на Mакедонската револуционерна борба, упати честитка до граѓаните на Република Македонија.

Почитувани граѓани на Република Македонија,

Одбележувањето на празникот на македонската револуционерна борба е симбол на долговековниот непокор и борба на македонскиот народ за слобода, државност и независност.

Корените на македонската револуционерна борба започнуваат со формирањето на Македонската револуционерна организација, на 23 Октомври 1893 година, кога шестемина македонски дејци ги обедини една визија за исполнување на вековниот сон – слободна Македонија. Патот до слободата беше исполнет со предизвици, но нивната сплотеност и решителност за остварување на своите идеали им даде сила да истраат пред тешкотиите.

Пламенот што го разгореа револуционерите го презедоа илинденците, борците во Народноослободителната и антифашистичка борба и АСНОМ-ците кои го остварија стремежот за слободна македонска држава. Без 23 октомври 1893-та не ќе беа можни ниту трите светли Илиндени од 1903-та, 1944-та и 1991-та.

Наша должност е да им оддадеме почит на нашите борци за слобода и независност, следејќи го нивниот пат. Како следбеници на нашите предци, почитувајќи ја историската реалност, треба да создадеме иднина за нашите потомци.

Почитувани сограѓани, нека ни е честит празникот!

Да живее Република Македонија!

д-р Ѓорге Иванов

 
Почеток < Пред 1 2 3 4 5 6 7 8 9 10 Следно > Крај
Страница 1 од 153