Новости
Sveti_trifun1
Претседателот Иванов на закројување винова лоза во Демир Капија
Вторник, 14 Февруари 2017

Претседателот на Република Македонија, д-р  Ѓорге Иванов денеска ја посети Демир Капија каде што по повод одбележувањето на православниот празник Свети Трифун присуствуваше на традиционалната прослава и симболичното закројување на винова лоза.

Обраќајќи се пред присутните и честитајќи го верскиот празник Свети Трифун, претседателот Иванов на лозарите и винарите им посака бериќетна година.

„ Во духот на нашата традиција, Свети Трифун е денот кога лозарите ги закројуваат лозјата и посакуваат годината да биде родна и благородна, а целиот труд и целата мака да бидат наградени наесен, кога ќе се собере грозјето. Затоа, на сите лозари им посакувам голем берикет, а на винарите квалитет. Посакувам нашето грозје и нашето вино да биде што поприсутно, како на домашните, така и на странските трпези. Посакувам многу повеќе туристи да доаѓаат и да ги посетуваат нашите винарии, а винскиот туризам да се развива во Македонија", рече претседателот Иванов.

Градоначалникот на општина Демир Капија, Трајче Димитриев истакна дека интересот за манифестацијата со која се одбележува празникот Свети Трифун континуирано расте.

Sveti_Trifun_2„ Демир Капија е мало, но убаво место кое од сите страни е заобиколено со прекрасна природа и претставува вистинска атракција, како за домашните, така и за странските туристи. Во последниве години бројот на туристи и посетители на нашиот град е евидентно зголемен. Во таа насока општина Демир Капија неуморно и континуирано работи на проекти за подобрување на инфраструктурата на градот и проекти коишто ќе придонесат за локалниот и економскиот развој на нашата општина. Реализацијата на вакви големи проекти не би била возможна без поддршка од нашите донатори, меѓу кои особено е значајна поддршката што ја добиваме од Владата на Република Македонија и од европските фондови", рече градоначалникот Димитриев.

Пред присутните на прославата по повод празникот Свети Трифун се обрати и евроамбасадорот Самуел Жбогар.

„ Градоначалникот спомена за неколку проекти што ги правиме заедно, Европската унија и општината. Само што ја посетив делницата од автопатот што ќе биде отворена оваа година. Исто така работиме на реконструкција на општинската зграда. Значи, има многу проекти на кои работиме заедно. Многу ја цениме соработката со општината и со нетрпение ја очекуваме реализацијата на сите идни заеднички проекти. ЕУ е тука за вас", рече амбасадорот Жбогар.

На прославата во Демир Капија присуствуваше и амбасадорката на Кина во Македонија, Јин Ликсијан.

zname_1
Свечено менување на државното знаме во Кабинетот на Претседателот на Република Македонија
Петок, 10 Февруари 2017
vevcani_diplomati_01
Претседателот Иванов и дипломатскиот кор во посета на Вевчани
Сабота, 28 Јануари 2017

Претставниците на дипломатскиот кор, воените аташеа, претставници на меѓународни организации и почесните конзули во Република Македонија во рамки на традиционалниот прием што по повод новогодишните празници го организира Претседателот на Република Македонија д-р Горѓе Иванов, денеска ја посетија општина Вевчани.

Во рамки на посетата на општината дипломатите ги посетија вевчанските извори и црквата „Свети Никола", како дел од богатото културно-историско наследство на Дримколскиот крај.

„Ова е мошне добра и плодотворна иницијатива на претседателот да организира вакви годишни средби и тоа надвор од главниот град. Тоа за нас е можност да посетиме други места, градови во земјата. Две години сум тука како амбасадор и првпат доаѓам во Вевчани, што само е потврда дека на овој начин не само што имам можност да запознаам нешто повеќе за убавините на Македонија, туку и дека ваквите активности се во насока на дополнителна промоција на туристичките потенцијали на Македонија", изјави г. Јацек Мултановски, амбасадорот на Република Полска во Македонија.

Според Шефот на Мисијата на ЕУ во Скопје, г. Самуел Жбогар, шеф, ова е одлична иницијатива на претседателот Иванов за вакви средби надвор од Скопје.

„На некој начин не тера да излеземе од главниот град и да ја видиме земјата, да ја запознаеме и да ја засакаме. Не само што имаме можност да прошетаме и да ги видиме убавините на Вевчани, културно-историското наследство, но и да се сретнеме да разговараме со нашите колеги во малку порелаксирана амосфера, што секако ни помага во подобрување на нашите односи во контекст на нашите работни обврски тука", рече Жбогар.

Градоначалникот на општината г. Цветомир Угриновски изрази задоволство што оваа година претседателот Иванов и дипломатскиот кор се во посета на Вевчани. Тој истакна дека ова е одлична можност гостите да се запознаат со перспективите за развој на општината во областа на туризмот.

Изминатите години, покрај Струга, дипломатскиот прием беше приреден и во Крушево, Гевгелија,  Берово и во Битола.

Sredba_srpska_zaednica
Средба со потпретседателот на српскиот парламент, амбасадорот на Република Србија и припадници на српската заедница во Македонија по повод Свети Сава
Петок, 27 Јануари 2017

Претседателот на Република Македонија, д-р Ѓорге Иванов, по повод празникот Свети Сава, денеска ги прими потпретседателот на Собранието на Република Србија г. Верољуб Арсиќ, амбасадорот на Република Србија во Република Македонија, г-а Душанка Дивјак – Томиќ и припадници на српската заедница во Република Македонија.

Честитајќи го празникот Свети Сава, македонскиот претседател истакна дека Република Македонија е пример на овие простори како се почитуваат и како се прифаќаат етничките заедници, вклучително и српската. Тој подвлече дека Македонија и Србија имаат долга историска и културна традиција која не може да биде нарушена поради различни ставови по некое прашање и дека онаму каде што постојат различни ставови и мислења треба да се решаваат преку дијалог.

Припадниците на српската заедница во Република Македонија се заблагодарија за приемот како и за континуираната поддршка и соработка со државните институциите во Република Македонија.

На средбата беше заклучено дека и во иднина ќе продолжат да се негуваат меѓусебните односи на Македонија и Србија, во духот на добрососедството и блиската соработка меѓу двата народа.

Veles_Vodici
Претседателот Иванов на одбележување на големиот христијански празник Богојавление - Водици во Велес
Четврток, 19 Јануари 2017

Претседателот на Република Македонија, д-р Ѓорге Иванов со сопругата г-ѓа Маја Иванова денеска присуствуваа на одбележувањето на големиот христијански празник Богојавление - Водици во Велес.

Меѓу 49-те православни верници кои денеска влегоа во водите на реката Вардар во Велес, крстот го фати 21-годишниот Влатко Стојанов.

Светиот чин го изврши митрополитот повардарски г. Агатангел во присуство на бројното свештенство и бројните православни верници и граѓани на Велес.

Влатко Стојанов, кој изјави дека прв пат учествува во фаќање на светиот крст, од претседателот Иванов доби подарок македонски крст со охридски рубин. Од митрополитот повардарски г. Агатангел, пак, доби златен крст.

Претседателот Иванов со сопругата г-ѓа Маја Иванова, утрово присуствуваа на богослужбата во црквата „Успение на Пресвета Богородица", со која чиноначалствуваше митрополитот повардарски г. Агатангел, по што се приклучија на литијата од црквата „Успение на Пресвета Богородица" до пешачкиот мост на реката Вардар, каде присуствуваа на чинот на осветување на водите на реката Вардар и на церемонијата на положување на светиот крст.

PRM__izjava_Egipet
Иванов: Неопходна е соработка на нашите безбедносни сили со Египет
Понеделник, 16 Јануари 2017

Неопходна е соработка на нашите безбедносни сили со Египет,  и нашите армиски сили, која досега е извонредна, оцени претседателот на Република Македонија, д-р Ѓорге Иванов, кој во Египет учествува на меѓународниот форум посветен на безбедноста во време на екстремизам и насилство.

„Досега имаме навистина исклучителна соработка во сферата на безбедноста, затоа што разменуваме информации и искуства во врска со заканите што ги имаме и Египет и ние. Египет, во неговото опкружување има закани од илегална миграција, нивната армија е на нивната јужна граница, каде ја чува долината на Нил од Рогот на Африка каде милиони луѓе се поттикнати да одат кон Европа", изјави претседателот Иванов,  додавајќи дека армиите на двете земји ја имаат една од клучните улоги.

„Нивната Армија има улога каква што има и нашата Армија. Како што нашата Армија е на нашата јужна граница и го чува коридорот низ долината на реката Вардар, така и нивната армија е во слична позиција", посочи македонскиот претседател во изјавата.

Претседателот Иванов изјави дека според извештаите на ОН, бројот на жители во Африка постојано ќе се зголемува и дека со овие закани ќе се соочуваме и идните години и децении.

„Состојбите во Африка се уште не се стабилизираат, и тоа ќе доведе многу млади луѓе да одат по потрага по среќа, односно ќе се упатуваат кон Европа", изјави претседателот Иванов.

„Македонија како земја ќе продолжи да учествува на вакви форуми и да дава свој придонес, со тоа што ние го имаме како искуство, во справувањето со илегалната миграција и со заканите од екстремни и терористички групи", порача македонскиот претседател.

„Тоа им е неопходно на многу земји, затоа што многу се затекнати од оваа состојба и се уште немаат решение како да се справуваат со сиве овие предизвици", изјави претседателот Иванов, истакнувајќи дека Република Македонија и Египет ја интензивираа соработката во повеќе области од заеднички интерес и дека на средбата со претседателот Ал Сиси, разговарале за унапредување на првната рамка со цел продлабочување на соработката и во областа на туризмот, земјоделието и образованието.

Оваа работна посета, што следи по официјалната посета на македонскиот Претседател на Египет, македонскиот претседател ја оцени како исклучително успешна.

Претседателот Иванов истакна дека целта на ваквите форуми е да се изнаоѓаат заеднички решенија и начини за надминување  за предизвиците и спротивставување на заканите на 21 век со кои се соочуваат сите земји во светот.

 
Почеток < Пред 1 2 3 4 5 6 7 8 9 10 Следно > Крај
Страница 7 од 169