Новости
Честитка до Претседателот Медведев
Вторник, 14 Септември 2010

Претседателот на Република Македонија д-р Ѓорге Иванов ја упати следната честитка до Претседателот на Руската Федерација, Дмитри Медведев, по повод неговиот роденден:

Почитуван господине Претседател,
Ми причинува особено задоволство од мое лично име и од името на граѓаните на Република Македонија, да Ви го честитам роденденот.
Истовремено ја користам можноста да Ви посакам Вам, и на Вашето семејство добро здравје и среќа, како и понатамошен успех во извршувањето на Вашите одговорни обврски со желби за просперитет на Вашата земја и благосостојба на нејзините граѓани.
Се уште во пријатно сеќавање ми се нашите неодамнешни средби во Москва и Санкт Петербург. Убеден сум, дека соработката и односите на  пријателство меѓу нашите две земји, во годините што доаѓаат, со заеднички ангажман успешно ќе се развиваат и продлабочуваат во сите области од заемен интерес. На тоа не обврзуваат долгата и богата традиција на македонско - руските односи.
И во оваа прилика, почитуван Претседателе, сакам да ја повторам мојата, и од граѓаните на Република Македонија, благодарност за досегашната поддршка што Вие лично и Вашата земја континуирано и ја давате на мојата земја.
Ве молам, почитуван Претседателе, да ги примите изразите на моето највисоко почитување.
д-р Ѓорге Иванов

Пристигнати честитки по повод Осми септември (Британија, Франција, Турција, Бразил...)
Недела, 12 Септември 2010

По повод празникот Осми септември, Претседателот на Република Македонија д-р Ѓорге Иванов доби честитки од голем број шефови на држави од светот.
Во честитката на Претседателот на Република Франција Никола Саркози до Претседателот на Република Македонија д-р Ѓорге Иванов се поздравува визната либерализација за македонските граѓани за патувањето во Европската Унија и се наведува: Убеден сум дека ќе продолжите со неопходните реформи, посебно во областа на судството и борбата против корупцијата во дух на дијалог и консензус, за да се премине во нова етапа. Франција ја поддржува Македонија и сака да и помогне за што сведочи вниманието кое го искажуваме кон билатералната соработка во придружувањето кон европската интеграција.
Нејзиното Кралско Височество, британската кралица Елизабета Втора, во својата честитка по повод Денот на независноста Осми септември до Претседателот Иванов порачува: Ми претставува особена чест и задоволство да Ви го честитам државниот празник, Денот на независноста, со најискрени желби и честитки за среќа и просперитет на Владата и народот на Република Македонија.
Претседателот на Република Турција Абдула Ѓул ги испрати своите најискрени честитки по повод Денот на независноста. Не се сомневам во тоа дека нашите пријателски односи и блиска соработка кои својата сила ја црпат од историските врски и заеднички вредности и цели, во наредниот период ќе продолжат да се развиваат и да бидат поразновидни. Уште еднаш сакам да го подвлечам значењето на елиминирањето на билатералните проблеми како прашања од дневен ред на регионалните иницијативи како и зацврстувањето на климата на балканската соработка во процесот на интегрирањето со евроатланските структури и дека во тој правец ги поддржуваме ставовите на Македонија – пишува понатаму во честитката на Претседателот Ѓул по повод Осми септември.
Луис Игнасио Лула да Силва, Претседател на Бразил, по повод празникот Осми септември, ги пренесува своите најискрени честитки, со желби за просперитет на Вашата земја и граѓани.
Пал Шмит, Претседателот на Унгарија, во честитката упатена до Претседателот Иванов, го изразува своето големо задоволство што во изминатите години контактите на високо ниво меѓу Македонија и Унгарија се интензивирани, и додава: Во остварувањето на стремежите за придружување на Македонија во НАТО и во Европската Унија, Република Македонија како и досега, и во иднина може да смета на мојата поддршка. Искрено посакувам Вашите напори во исполнувањето на задачите кои Ви претстојат што поскоро да бидат крунисани со успех.
Неговото кралско височество Мухамед Шести, Крал на Мароко, во честитката по повод Денот на независноста на Република Македонија изразува надеж дека и во иднина ќе се соработува на највисоко ниво за проширување на односите на пријателство и соработка меѓу двете земји, во взаемно полза на народите.
Претседателот на Казахстан Нурсултан Назарбаев испрати честитка до Република Македонија по повод Денот на независноста во која истакнува дека е убеден оти натамошниот развој на конструктивно партнерство меѓу Казахстан и Македонија ќе биде засновано врз взаемното разбирање и пријателските односи на нашите народи.

Писмо до Претседателот Обама на годишнината од нападите на 11 септември
Сабота, 11 Септември 2010

По повод годишнината од нападите на 11 септември 2001 година, Претседателот на Република Македонија д-р Ѓорге Иванов упати писмо до Претседателот на Соединетите Американски Држава, Барак Обама. Следи текстот на писмото:
Почитуван г-дине Претседател,
На 9-годишнината од терористичките напади што го потресоа целиот свет, се придружувам кон единственото чувство дека настаните од тој ден не смеат никогаш да бидат заборавени. Девет поминати години не можат ја избришат грозоморната трагедија од 2001 година.
Никогаш не смее да се заборави чувството на згрозување, страв и жалење. Никогаш не смеат да се заборават невините жртви кои го загубија животот. Никогаш не смее да се заборави начинот на кој меѓународната јавност жалеше заедно со Вашата голема нација и начинот на кој светот покажа солидарност со Америка во борбата против тероризмот.
Затоа, дозволете ми да оддадам почит за илјадниците невини животи во овие терористички напади. Сеќавајќи се на овој ден, моите мисли и молитви се со нивните семејства и пријатели, со Вас почитуван Претседателе и со пријателскиот народ на Соединетите Американски Држави.
Американскиот народ има пријатели и Република Македонија е еден од тие верни и докажани пријатели и партнери. Борбата за мир, слобода и подобра иднина за целото човештво е далеку од завршена. Македонија ќе продолжи со истата посветеност да дејствува за постигнување на овие цели, што се потврдува и со ангажманот на нашите воени сили во Авганистан за унапредување на развојот и стабилноста на оваа земја.
Ви ги упатувам, почитуван Претседателе, изразите на моето највисоко почитување.
д-р Ѓорге Иванов

Иванов - Ван Ромпуј: регионот да биде дел од обединета Европа
Петок, 10 Септември 2010

Претседателот на Република Македонија д-р Ѓорге Иванов порача дека од голема важност, не само за македонските граѓани, туку и за целиот регион, доколку Европскиот Совет донесе одлука за отварање на датум за преговори токму за време на белгиското претседателство. Претседателот ова го изјави на заедничката прес конференција со Претседателот на Европскиот Совет Херман ван Ромпуј во Брисел.
- Претседателот Ромпуј го информирав за сите акции кои Македонија ги презема за да ја надмине пречката со Грција и се надевам дека наскоро таа ќе биде зад нас - додаде Претседателот Иванов.
Претседателот изјави дека на Ромпуј му ги пренел и очекувањата на македонските граѓани и нивниот евроентузијазам. Македонскиот претседател посочи дека неговата визија за регионот е како дел од обединета Европа.
- ЕУ прави големи напори за да се дојде до решение за спорот со името. Но сега е вистинскиот момент кога двете земји треба да разговараат и да најдат решение кое е прифатливо за двете страни - изјави Ван Ромпуј по средбата.
Ромпуј рече дека влезот на Македонија во ЕУ е многу важен чекор за земјата. Вложувањето на големи напори за имплементација на сите реформи за влез во ЕУ, како што рече тој, ќе значи добивање на позитивен извештај за Македонија од страна на Европската комисија во ноември.
Како што информираше претседателот Иванов на средбата со претседателот на европскиот совет било разговарано за она што Македонија го има досега постигнато и за идните предизвици, за кои како што, како што рече, Ромпуј имал големо разбирање.
Претседателот Иванов, кој во Брисел е придружуван од Министерот за надворешни работи Антонио Милошоски, во рамките на дводневната посета на Брисел, освен со Ромпуј, денеска се сретна и со Претседателот на Претставничкиот дом на Кралството Белгија, Андре Флау.
Целта на средбите на претседателот со европските претставници е со аргументи за напредокот на нашата земја да се апелира за позитивен извештај и добивање на датум за почеток на преговори.

Претседателот Иванов во посета на Брисел
Четврток, 09 Септември 2010

Претседателот на Република Македонија д-р Ѓорге Иванов, кој во Брисел имаше средба со Претседателот на Европската Комисија Жозе Мануел Баросо и со комесарот за проширување на Унијата Штефан Фуле, изјави дека Македонија очекува позитивен извештај од Комисијата во ноември и датум за почнување на преговорите за полноправно членство.
- Овде сум како Претседател на држава во која евро-атлантските интеграции се врвен приоритет, со плебисцитарно изјаснување на граѓаните во поддршка на европската иднина на Република Македонија. Затоа, искрено верувам дека препораката што ја дадовте наскоро ќе резултира и со датум за отпочнување на преговорите - изјави претседателот Иванов по средбата со Баросо.
По прашањето на спорот кој Грција го наметнува пред македонските интеграции, Претседателот изјави дека Македонија е конструктивен чинител и партнер и изрази очекување дека Грција ќе се однесува европски во претстојниот период со цел надминување на овој билатерален и ирационален спор.
- Јас ја разбирам екстремната чувствителност на ова прашање. Но, ги повикувам сите страни да ја разрешат оваа пречка што е можно побрзо. Време е да се донесе одлука. Сега е време да се одлучи во врска со ова прашање за името - изјави Баросо на заедничката конференција за печатот. Баросо оцени дека во изминатиот период постои подобрување на климата во разговорите меѓу Скопје и Атина и волја кај двете страни за надминување на спорот. Комесарот Баросо исто така побара задржување на темпото на реформи во Македонија во претстојниот период.
Претседателот Иванов во Брисел е придружуван од страна на шефот на македонската дипломатија Антонио Милошоски. За утре предвидена е средба со Претседателот на Европскиот Совет, Херман Ван Ромпуј и со претседателот на Претставничкиот дом на Кралството Белгија Андре Флау.

Честитка на Претседателот Иванов по повод празникот Рамазан фитер Бајрам
Четврток, 09 Септември 2010

По повод верскиот празник Фитер Бајрам, Претседателот на Република Македонија д-р Ѓорге Иванов ја упати следната честитка до поглаварот на Исламската верска заедница во Република Македонија Реис Ул Улема Хаџи Сулејман Еф. Реџепи, до Ријасетот на ИВЗ и до сите муслимански верници во Македонија:
Дозволете ми во името  на граѓаните на Република Македонија и во мое лично име Вам лично на членовите на Ријасетот на Исламската верска заедница и на сите  припадници на исламската вероисповед во Република Македонија да Ви го честитам верскиот празник Рамазан фитер Бајрам.
Во овие мигови на празнување  посакувам кај сите верници да преовладува чувството на  мир, љубов, толеранција и меѓусебно разбирање. Искусното водство на Исламската верска заедница, долгата традиција на практикувањето и празнувањето на исламската вера во Македонија и нејзините длабоки хуманистички традиции и пораки се извор на гордост на сите во Република Македонија. Сигурен сум дека муслиманските верници и понатаму ќе напредуваат лично и како заедница во рамките на нашата заедничка држава.
Убеден сум дека како добри верници и верни сограѓани во континуитет сите заедно ќе продолжиме со добропознатата пракса на меѓусебно дружење и заедничко празнување не само на овој празник туку и на сите други верски празници, како што и јас лично ја имав можноста да го почувствувам гостопримството на муслиманските верници во текот на месецот Рамазан. Ова ни дава натамошен поттик и верба  да продолжиме да работиме за продлабочување на традицијата на меѓусебно почитување, взаемна соработка и заеднички соживот.
Добрата традиција на меѓурелигиозната толеранција и рамноправниот третман кон сите верски заедници и религиозни групи во Република Македонија покажува дека местото на нашата земја и е во рамки на европското семејство на нации и држави. Нашиот исклучителен придонес како земја во која вери, традиции и разни етнички групи соработуваат на градењето на заеднички дом, е доказ дека е можна подобра иднина за регионот, Европа и светот.
Почитуван Реис Ул Улема Хаџи Сулејман Еф. Реџепи, честитајќи Ви го уште еднаш Рамазан фитер Бајрам дозволете ми Вам лично, на членовите на Ријасетот на ИВЗ и на сите припадници на исламската вероисповед во Република Македонија да им посакам здравје, среќа, добро расположение и духовен мир.

 
Почеток < Пред 181 182 183 184 185 186 187 188 189 190 Следно > Крај
Страница 181 од 197