Новости
Претседателот Иванов во посета на Брисел
Четврток, 09 Септември 2010

Претседателот на Република Македонија д-р Ѓорге Иванов, кој во Брисел имаше средба со Претседателот на Европската Комисија Жозе Мануел Баросо и со комесарот за проширување на Унијата Штефан Фуле, изјави дека Македонија очекува позитивен извештај од Комисијата во ноември и датум за почнување на преговорите за полноправно членство.
- Овде сум како Претседател на држава во која евро-атлантските интеграции се врвен приоритет, со плебисцитарно изјаснување на граѓаните во поддршка на европската иднина на Република Македонија. Затоа, искрено верувам дека препораката што ја дадовте наскоро ќе резултира и со датум за отпочнување на преговорите - изјави претседателот Иванов по средбата со Баросо.
По прашањето на спорот кој Грција го наметнува пред македонските интеграции, Претседателот изјави дека Македонија е конструктивен чинител и партнер и изрази очекување дека Грција ќе се однесува европски во претстојниот период со цел надминување на овој билатерален и ирационален спор.
- Јас ја разбирам екстремната чувствителност на ова прашање. Но, ги повикувам сите страни да ја разрешат оваа пречка што е можно побрзо. Време е да се донесе одлука. Сега е време да се одлучи во врска со ова прашање за името - изјави Баросо на заедничката конференција за печатот. Баросо оцени дека во изминатиот период постои подобрување на климата во разговорите меѓу Скопје и Атина и волја кај двете страни за надминување на спорот. Комесарот Баросо исто така побара задржување на темпото на реформи во Македонија во претстојниот период.
Претседателот Иванов во Брисел е придружуван од страна на шефот на македонската дипломатија Антонио Милошоски. За утре предвидена е средба со Претседателот на Европскиот Совет, Херман Ван Ромпуј и со претседателот на Претставничкиот дом на Кралството Белгија Андре Флау.

Честитка на Претседателот Иванов по повод празникот Рамазан фитер Бајрам
Четврток, 09 Септември 2010

По повод верскиот празник Фитер Бајрам, Претседателот на Република Македонија д-р Ѓорге Иванов ја упати следната честитка до поглаварот на Исламската верска заедница во Република Македонија Реис Ул Улема Хаџи Сулејман Еф. Реџепи, до Ријасетот на ИВЗ и до сите муслимански верници во Македонија:
Дозволете ми во името  на граѓаните на Република Македонија и во мое лично име Вам лично на членовите на Ријасетот на Исламската верска заедница и на сите  припадници на исламската вероисповед во Република Македонија да Ви го честитам верскиот празник Рамазан фитер Бајрам.
Во овие мигови на празнување  посакувам кај сите верници да преовладува чувството на  мир, љубов, толеранција и меѓусебно разбирање. Искусното водство на Исламската верска заедница, долгата традиција на практикувањето и празнувањето на исламската вера во Македонија и нејзините длабоки хуманистички традиции и пораки се извор на гордост на сите во Република Македонија. Сигурен сум дека муслиманските верници и понатаму ќе напредуваат лично и како заедница во рамките на нашата заедничка држава.
Убеден сум дека како добри верници и верни сограѓани во континуитет сите заедно ќе продолжиме со добропознатата пракса на меѓусебно дружење и заедничко празнување не само на овој празник туку и на сите други верски празници, како што и јас лично ја имав можноста да го почувствувам гостопримството на муслиманските верници во текот на месецот Рамазан. Ова ни дава натамошен поттик и верба  да продолжиме да работиме за продлабочување на традицијата на меѓусебно почитување, взаемна соработка и заеднички соживот.
Добрата традиција на меѓурелигиозната толеранција и рамноправниот третман кон сите верски заедници и религиозни групи во Република Македонија покажува дека местото на нашата земја и е во рамки на европското семејство на нации и држави. Нашиот исклучителен придонес како земја во која вери, традиции и разни етнички групи соработуваат на градењето на заеднички дом, е доказ дека е можна подобра иднина за регионот, Европа и светот.
Почитуван Реис Ул Улема Хаџи Сулејман Еф. Реџепи, честитајќи Ви го уште еднаш Рамазан фитер Бајрам дозволете ми Вам лично, на членовите на Ријасетот на ИВЗ и на сите припадници на исламската вероисповед во Република Македонија да им посакам здравје, среќа, добро расположение и духовен мир.

Честитка по повод празникот Рош Хашана до Еврејската заедница на Македонија
Среда, 08 Септември 2010

По повод празникот Рош Хашана, Еврејска Нова Година, Претседателот на Република Македонија д-р Ѓорге Иванов ја искористи можноста да упати честитка до Бјанка Суботиќ, Претседател на Еврејската заедница на Македонија, како и до сите припадници на еврејската заедница во Република Македонија:
Почитувана г-ѓо Суботиќ, дозволете ми да во името на граѓаните на Република Македонија и во мое лично име Вам лично и на сите припадници на еврејската заедница во Република Македонија да Ви ја честитам новата 5771 година според еврејскиот календар. Во ова пригода посакувам празничните мигови да ги поминете во добро расположение, спокојство, здравје, среќа и  духовен мир.
Воедно би сакал да го нагласам моето лично убедување дека припадниците на еврејската заедница во Република Македонија и понатаму ќе продолжат го даваат својот придонес за развојот и напредокот на Македонија како заедница на слободни и равноправни граѓани. Сметам дека моја лична обврска, како Претседател, и на сите политички фактори во земјата, е да им овозможиме на нашите граѓани услови во кои ќе можат во целост да го исполнат својот личен потенцијал, за да можеме навистина сите припадници на еврејската заедница, и сите граѓани воопшто, да кажеме дека Македонија е наш заеднички дом.
Уште еднаш честитајќи ви го  Вам лично и на припадниците на еврејската заедница овој празник, примете ги изразите на мојата исклучителна почит.

Пристигнати честитки по повод Осми септември (САД, Германија, Италија, Грција...)
Среда, 08 Септември 2010

По повод празникот 8 септември, Денот на независноста на Република Македонија, Претседателот д-р Ѓорге Иванов доби честитки од голем број шефови на држави од светот.
Во својата порака, Претседателот на Соединетите Американски Држави Барак Обама ги испраќа своите честитки до граѓаните на Република Македонија. Македонија е ценет партнер на Соединетите Држави, и ние го вреднуваме македонскиот придонес кон светската безбедност. Ја поддржуваме Македонија која продолжува на реформскиот пат и се движи кон интеграција во евро-атланските институции. Верувам дека нашето партнерство дополнително ќе се засили и продлабочи како што ја продолжуваме нашата соработка за да оствариме толеранција, мир и просперитет за да го унапредиме човековото достоинство – пишува во пораката од Претседателот Обама до Претседателот Иванов.
Германскиот Претседател Кристјан Волф во својата честитка по повод 8 Септември упатена до Претседателот Иванов порачува – Доближувањето на Вашата земја до евроатланските структури претставува голем предизвик кој бара готовност за реформи и политичка далекувидност. Препораката на Европската Комисија за отпочнување на преговорите за членство е важен успех.
Претседателот на Република Италија Џорџо Наполитано  истакнува дека Италија останува убедена дека комплетното вклучување на западниот Балкан во процесот на евро-атланската интеграција е суштински услов за реализирање на главната цел – стабилност и економски и социјален развој на регионот. Убеден сум дека во рамките на заедничката евро-атланска припадност нашите веќе плодни билатерални односи ќе можат дополнително да се развиваат, вели Претседателот Наполитано.
Претседателот на Република Грција Каролос Папуљас упати честитка по повод 8 Септември во која се вели - По повод националниот ден на Вашата држава, би сакал во име на грчкиот народ и во мое лично име да Ви ги упатам моите најдобри желби за просперитет, благосостојба и напредок на поранешната Југословенска Република Македонија и нејзиниот народ.
Далиа Грубаускатие, Претседател на Република во своето писмо вели дека Литванија силно ги поддржува македонските аспирации за полноправно членство во европските и евро-атланските структури и се надеваме дека Вашата земја ќе направи голем чекор кон оваа цел во текот на годинава. Сакам да останете центар на европските вредности и пример за кохезивно мултиетничко општество за целиот регион и Европа.
Претседателот на Претседателството на Босна и Херцеговина Харис Силајџиќ изразува убеденост дека односите меѓу двете земји ќе се развиваат кон нашата заедничка цел, изградбата на европската иднина на нашите држави, пријателство, соработка, добрите билатерални односи и стабилност во регионот.
Во честитката од Мишел Жан, Генерален Гувернер на Канада, се изразува надеж дека ќе продолжи соработката на Македонија и Канада за мир и напредок на целиот регион.
Квентин Брајс, Генерален Гувернер на Комонвелтот Австралија вели дека ја поздравува соработката на највисоко ниво меѓу двете држави, меѓусебните посети меѓу пратеници и функционери од Македонија и Австралија, како и иницијативите за засилена соработка во областа на науката и образованието.
Кралот на Саудиска Арабија Абдула бин Абдулазиз ал Сауд и принцот Султан бин Абдулазиз ал Сауд во своите честитки до Претседателот Иванов искажуваат желби за напредок и просперитет за Македонија во иднината.
Асиф Ал Зардари, Претседател на Исламска Република Пакистан, по повод 8 Септември упати топли поздрави со желба за просперитетна иднина за граѓаните на Република Македонија.

Честитка до Претседателот Перес по повод Еврејската Нова Година
Вторник, 07 Септември 2010
Средба со вицепремиерите Ставревски и Наумовски и министрите Милошоски и Маневски
Петок, 03 Септември 2010

Претседателот на Република Македонија д-р Ѓорге Иванов денес имаше средба со Заменик претседателот на Владата на Република Македонија и министер за финансии Зоран Ставревски, Заменик претседателот на Владата Васко Наумовски, Министерот за надворешни работи Антонио Милошоски и Министерот за правда Михајло Маневски.
Средбата беше дел од разговорите кои Претседателот Иванов ги организира во пресрет на посетата на Брисел на 9 и 10 септември, каде Претседателот ќе оствари средби со високи претставници на раководството на Европската Унија. Предвидено е Претседателот да одржи повеќе други средби со надлежни функционери од извршната и законодавната власт.
Тема на денешната средба на Претседателот со членовите на Владата беа активностите и постигнувањата во врска со реформите кои Република Македонија ги врши во рамките на евро-атланските интеграции. Конкретни области кои беа разгледани на средбата се текот на реформите во судството, проектите за енергетско и инфраструктурно поврзување на Република Македонија, плановите за  реформи во јавната администрација и реформите во сферата на економијата со кои беше оценето дека Македонија го има достигнато статусот на функционална пазарна економија.
Претседателот Иванов изрази задоволство од текот на активностите за хармонизација на законодавството на Република Македонија, во повеќе сфери, со европското законодавство, за кое оцени дека во голема мерка ќе помогне при побрзо спроведување на преговорите за полноправно членство со Унијата. Претседателот оцени дека сите преземени мерки и активности придонесуваат кон исполнување на условите за почнување на преговорите со Унијата, што беше одбележано и во минатогодишниот извештај за напредокот на Европската Комисија. На средбата беше истакнат позитивниот ефект кој почнувањето на преговорите за членство во Унијата ќе го има врз реформските процеси во Македонија.
Претседателот на средбата ги поздрави најавите за измена на некои политички одлуки кои можеа да придонесат за претставување на поинаква слика за Република Македонија пред институциите на Европската Унија. Посетата на Брисел, Претседателот Иванов ќе ја искористи за објективно претставување на состојбата во земјата и стореното од страна на Република Македонија. Претседателот, воедно, во текот на посетата ќе се концентрира на придобивките кои Македонија, но и Европската Унија, ќе ги имаат од забрзување на процесот на интеграции во регионот на Југоисточна Европа.

 
Почеток < Пред 171 172 173 174 175 176 177 178 179 180 Следно > Крај
Страница 175 од 191