Новости
Претседателот Иванов во посета на опсерваторијата Кокино
Сабота, 31 Јули 2010

Претседателот на Република Македонија д-р Ѓорге Иванов денес присуствуваше на свеченоста организирана на мегалитската опсерваторија Кокино.
На утринската свеченост актери и уметници претставија древен обред кој се вршел на локалитетот Кокино. Археологот Јовица Станковски на собраните им го објасни значењето на ритуалот и улогата која ја имала опсерваторијата Кокино. Промовирањето на опсерваторијата Кокино почна уште пред 8 години.За овој период Кокино доби научна потврда од повеќе престижни организации, а најзначаната е на НАСА.
Во рамките на посетата, Претседателот Иванов престојуваше и во Старо Нагоричане, каде ја посети црквата Свети Ѓорѓи.
- Ние како локална самоупрва ќе правиме напори да иницираме проекти преку Владата за инфраструктурно уредување на нашето Кокино, кое е еден од приоритетите за развој на општината. Основен проблем е патот кој бара итна реконструкција и се надевам дека ќе успееме за кратко време да го решиме, изјави Миодраг Јовановиќ, градоначалник на општина Старо Нагоричане

Новоименуваниот амбасадор на Република Бугарија Раковски Симеонов Лашев ги предаде акредитивните писма
Петок, 30 Јули 2010

Претседателот на Република Македонија д-р Ѓорге Иванов денес ги прими акредитивните писма на новоименуваниот вонреден и ополномоштен амбасадор на Република Бугарија, г-дин Раковски Симеонов Лашев. На свеченото предавање на акредитивите, Претседателот Иванов му посака добредојде на амбасадорот Лашев во Македонија. Претседателот изрази надеж дека амбасадорот Лашев ќе даде силен придонес кон натамошно унапредување на односите на двете држави.
Според Претседателот Иванов, односите на двете земји се на одлично ниво, со големи можности за натамошно унапредување на соработката. Претседателот оцени дека двете држави делат заеднички вредности, стратегиски цели и се посветени на соработката, во интерес на државите, како и во интерес на развојот на регионот.
Амбасадорот Лашев изјави дека нема да штеди сили во работата на зацврстувањето на врските и на соработката меѓу Република Македонија и Република Бугарија. Амбасадорот изрази задоволство од нагорниот развој на билатералната соработка, особено во областа на трговијата и енергетиката. Според амбасадорот Лашев, една област на која мора да се концентрира меѓудржавната соработка е во заедничките инфраструктурни проекти кои ги поврзуваат двете земји.

Средба на Претседателот Иванов со албанскиот министер за надворешни работи Илир Мета
Среда, 28 Јули 2010

Претседателот на Република Македонија д-р Ѓорге Иванов денеска го прими г-дин Илир Мета заменик премиер и министер за надворешни работи на Република Албанија. На средбата беше изразено задоволството од нивото на билатералните односи меѓу Република Македонија и Република Албанија, како и од заемната определба за натамошно јакнење на пријателството и градење на односи низ отворен дијалог. Високото ниво во нашите односи се потврдува и со континуираниот политички дијалог меѓу двете земји, кој се карактеризира со чести средби на највисоко ниво, кои директно придонесуваат за поинтензивна соработка во сите области - изјави Претседателот Иванов на средбата.
Двајцата соговорници констатираа дека Македонија и Албанија, споделувајќи идентична визија за интеграцијата во евро-атлантските структури, се посветени на регионалната соработка и на градењето на добрососедски односи и во таа насока се согласија за натамошна взаемна поддршка во интегративните процеси.
На средбата се заклучи дека исклучително значаен сегмент во односите меѓу двете земји треба да биде економската соработка, за која се констатираше дека не кореспондира со нивото во политичките односи и со можностите на двете економии.

 

Претседателот Иванов во официјална посета на Швајцарската Конфедерација
Понеделник, 26 Јули 2010

Претседателот на Република Македонија д-р Ѓорге Иванов во рамките на официјалната посета се сретна со претседателот на Швајцарската Конфедерација Дорис Лојтхард. Односите меѓу Македонија и Швајцарија се многу добри и без отворени прашања, а особено во делот на економската соработка, каде постои можност за натамошно подобрување, оценија претседателите на двете земји  Иванов и  Лојтхард по денешната средба во замокот Лохн во Керзац крај Берн.
Претседателот Иванов посочи дека двете земји во континуитет ги градат односите и се заблагодари за помошта што и ја дава Швајцарија на Македонија за да ги достигне критериумите на НАТО и ЕУ и со тоа да ги исполни стратешките приоритети.
-Финансиската и техничката помош што ја добиваме од Швајцарија значително влијае на развојот на нашите реформи и градењето мултиетничка демократија. Со Швајцарија имаме извонредни билатерални и мултилатерални односи и ги користиме нивните искуства во претседавањето со Советот на Европа, рече Иванов.

Претседателот на Швајцарската конфедерација Дорис Лојтхард истакна дека соработката меѓу двете земји продолжува
- Се довговоривме и понатаму да ја продлабочиме нашата соработка особено во делот на животната средина, водоснабдувањето и полициската соработка. Во интерес на Швајцарија е мирен и стабилен Балкан поради што ќе продолжиме да ја поддржуваме Македонија во нејзините напори да стане членка на Европската унија, изјави претседателката Лојтхард.
Претседателот Иванов нагласи дека има голем простор за зголемување на економската соработка меѓу двете земи и додаде дека македонската дијаспора која брои преку 60.000 лица во Швајцарија може да биде мост на поврзување.
- Ние сме горди на нашите иселеници и очекуваме уште повеќе да ги подобрат врските меѓу нашите две земји бидејќи кога доаѓаат во Македонија тие носат и дел од Швајцарија, рече Иванов.
Прашан колку кочењето на интегративните процеи влијае врз безбедноста на Македонија, претседателот Иванов оцени дека тоа не влијае само на безбедноста во Македонија туку и на целиот регион.
- Билатералниот проблем го блокира процесот на стабилизација на целиот регион, а блокирањето на членството во НАТО од страна на Грција придонесе за откажување на најавените инвестиции во Македонија, рече Иванов.
Замолена за коментар за проблемот што го наметнува Грција со името на Македонија, швајцарската претседателка Лојтхард, рече дека не е работа на Швајцарија да коментира спорови меѓу две држави.
- Швајцарија секогаш учествува во решавањето на конфликти и ја нуди својата помош, но за да може да го направи тоа потребно е да се поднесе барање. Досега никој до нас не поднел барање за помош во спорот со името, рече Лојтхард и додаде дека се недева оти зачестените билатерални средби меѓу претставници на Македонија и на Грција ќе помогнат да се најде заемно прифатливо решение.
Според неа, одолговлекувањето на почетокот на преговорите на Македонија со ЕУ ќе придонесе за демотивирање на населението.

Средба на претседателот Иванов со македонските иселеници во Швајцарија
Недела, 25 Јули 2010

Претседателот на Република Македонија д-р Ѓорге Иванов денеска се сретна  со македонските иселеници во Берн во рамките на  дводневната официјална посета на Швајцарската Конфедерација.  .
Претседателот Иванов ги повика македонските иселеници да вложат во Македонија преку отворање мешовити македонско-швајцарски фирми и им порача дека во нивната татковина се прави се за да се креира поволна бизис клима.
Тој им ги претстави сите реформи што беа спроведени за подобрување на бизнис климата  со кои земјата беше рангирана како трет најголем реформатор во светот од страна на Светска банка и им порача дека вратите на Македонија секогаш се отворени за иселениците кои, како што рече, треба да ги искористат поволностите  што се нудат во слободните економски зони.
- Вие придонесувате за јакнењето на одличните билатерални односи меѓу Македонија и Швајцарија, земја со која немаме отворени прашања и која многу пати досега ни помогнала, рече претседателот Иванов, нагласувајќи дека е  потребно да се зголеми економската сорабтка меѓу двете земји.
Иселениците се интересираа за начинот на кој ќе се спроведе гласањето на дијаспората и побараа да се зајакне капацитетот на Агенцијата за иселеништво. Според нив, само трите предвидени места за пратеници во Собранието од дијаспората се многу малку. Тие се интересираа и за политичките поделби во Македонија, на што претседателот Иванов им одговори дека земјата е во фаза на учење на демократијата.
- Партиите се создадени да го делат народот, а претседателот да го обединува. Правам се за тоа, но за жал премногу сме политички поделени, рече Иванов, додавајќи дека луѓето ќе престанат да се интересираат за политика кога ќе зајакне економијата.
Според податоците од 2005 година во Швајцарија живеат околу 65.000 македонски иселеници, или околу 0,8 отсто од вкупно 7,6-те милони швајцарски жители, и тие претставуваат околу еден процент од вкупното швајцарско население.

 
Почеток < Пред 171 172 173 174 175 176 177 178 179 180 Следно > Крај
Страница 172 од 184