Новости
Претседателот Иванов го одликуваше Фестивалот Охридско Лето
Понеделник, 12 Јули 2010

Претседателот на Република Македонија Ѓорге Иванов денеска со Орден за заслуги за Македонија ја одликуваше Националната установа фестивал „Охридско лето“, за долгогодишното успешно презентирање на македонското и светско музичко и културно творештво, како врвна музичко-сценска манифестација која дала исклучителен придонес во збогатувањето и промовирањето на македонската култура и афирмацијата на Република Македонија во светот.
На церемонијата одржана попладнево во претседателската вила „Билјана“ во Охрид, претседателот Иванов истакна дека му претставува огромна чест и задоволство што се одликува манифестација која веќе 50 години е место за средби на световите, за иновации и игра на фантазијата, и пред се, како што рече, „од кое се трасираат нови патишта, се охрабрува уметничкиот збор и дострелите на современоста со истовремена проекција на визии за иднината“.
- Денес го одбележуваме педесетото јубилејно издание на оваа престижна макдонска културна манифестација, која сите овие изминати години посветено ја промовираше врвната европска и светска уметност на сцените во Охрид, но истовремено ја глорифицираше и македонската култура, рече Иванов, посакувајќи му на фестивалот и понатаму да биде отворена космополитска сцена на која ќе се отелотворуват уметничките визии, остварувајќи највисоки естетски дострели што ќе одекнуваат во светот.
- Посакувам благородната мисија на „Охридско лето“ да продолжи уште многу години, задржувајќи ја својата единственост, препозналивост и специфичност, порача шефот на државата.
Директорот на „Охридско лето“ Васил Зороски, во име на фестивалската управа истакна дека високото државно призание нека биде потстрек за уште посветла иднина на нашиот реномиран фестивал.
- Низ петте изминати децении фестивалот „Охридско лето“ прерасна во институција со апсолутно најголема и најзначајна продукција на приредби од областа на класичната музика во Република Македонија, воедно и институција со завидна национална и меѓународна театарска продукција, истакна Зороски.
Тој потсети дека милионската публика во Охрид била сведок на повеќе од 2.500 фестивалски приредби, од кои настапи на повеќе од 250 оркестарски и хорски ансамбли, речиси две илјади инструментални и вокални солисти, како и стотина театарски амсамбли.
Вечер, на сцената на Атничкиот театар во Охрид со настапот на светски познатиот маедонски пијанист Симон Трпчески и Рускиот национален оркестар, под диригентска управа на маестро Михаил Плетњев, ќе биде отворено 50-то јубилејно издание на фестивалот „Охридско лето“, најрепрезентативната културна музичко-сценска манифестација во земјата.

Честитка до Кралот на Шпанија Хуан Карлос Први, по победата на шпанската фудбалска репрезентација
Понеделник, 12 Јули 2010

Претседателот на Република Македонија д-р Ѓорге Иванов упати честитка до Неговото височество, Кралот на Шпанија Хуан Карлос Први, по повод победата на шпанската фудбалска репрезентација на Светското првенство кое се одржа во Јужна Африка. Следи текстот на честитката -
Ваше Височество,
Ми претставува особено задоволство во името на граѓаните на Република Македонија и во мое лично име да Ви го честитам освојувањето на титулата светски првак, за првпат во богатата фудбалска историја на Шпанија. Обединувањето на двете титули, европската и светската, е доказ за врвниот квалитет, сплотеноста и прекрасната атмосфера што владее во репрезентацијата. Впрочем јас, како и цела фудбалска Македонија, лично се уверив во тоа при минатогодишното гостување на шпанските фудбалери во Скопје, кога присуствувавме на еден меч за паметење. Се надевам дека не е далеку денот кога нашите две репрезентации ќе се сретнат на едно Европско или Светско првенство, што е желба на огромен број на фудбалски вљубеници во Република Македонија.
Испраќајќи уште еднаш искрени честитки до Вас и до пријателскиот шпански народ, Ве молам да ги примите изразите на моето највисоко почитување.
д-р Ѓорге Иванов

Иванов: Геноцидот во Сребреница опомена до идните генерации
Недела, 11 Јули 2010

Сите проблеми мора да се решаваат со дијалог, да не се користи насилство и злосторства за да се остварат суетите на одредени политичари, порачаа претседателите од регионот кои присуствуваа на комеморацијата по повод 15-годишнината од воените злосторства во Сребреница.
Македонскиот претседател Ѓорге Иванов од меморијалниот центар Поточари изјави дека геноцидот во Сребреница е потресно сведоштво и опомена до сите идни поколенија дека конфликтите што завршуваат со вакви масакри никогаш не даваат резултати.
- Мора да се дојде до решение кое ќе го смислат луѓе што размислуваат со отворен ум. До вакви геноциди на нашиот простор и до злосторства кои неможат никогаш да се простат довеле затворени умови - рече меѓу другото денеска во Сребреница Претседателот Иванов.
На 15-годишната од масакрот што српските сили го извршија врз повеќе од осум илјади Бошњаци беа погребани 775 новоидентификувани тела. На овој чин меѓу другите почит оддаде и претседателот на Република Србија, Борис Тадиќ, кој оцени дека оваа страница од историјата не може да се затвори се додека не бидат осудени сите оние кои се виновни за злосторствата. На комеморацијата присуствуваа Претседавачот на Претседателството на Босна и Херцеговина Харис Силајџич, членот на претседателството Жељко Комшиќ, турскиот премиер Реџеп Таип Ердоган, претседателите на Словенија и Црна Гора Данило Тирк и Филип Вујановиќ, Премиерот на Белгија Ив Летерм, Генералниот Секретар на Советот на Европа Торбјорн Јагланд, министерот за надворешни работи на Франција Бернард Кушнер и голем број други политичари.
Во Меморијалниот споменик во Поточари близу Сребреница досега се идентификувани околу 3.500 тела.

Претседателот Иванов ги посети македонските мировници во мисијата АЛТЕА во Босна
Сабота, 10 Јули 2010

Република Македонија секогаш била насочена кон промовирање и извезување на мирот, изјави  денеска претседателот и врховен командант на воoружените сили на АРМ, Ѓорге Иванов при посетата на македонските мировници во мисијата на Европската унија АЛТЕА во базата Бутмир во Сараево. 
- Македонија учествува во мировните мисии и мировните операции и секогаш настојува да даде придонес во рамки на можностите каде што има потреба од тоа. Редовно сме присутни со наши војници во мисијата АЛТЕА, присутни сме во Авганистан, бевме во Ирак, а имаме и наш  војник во Либан. Секаде каде што имаме можност да учествуваме, Македонија дава свој придонес, рече Иванов.
Тој додаде дека иако еден период целиот регион имал потреба од дополнителни меѓународни сили, сега треба да го извезуваме мирот.
Командирот на ЕУФОР, Бернард Баир, изрази благодарност за придонесот што македонските мировници го даваат во мисијата АЛТЕА.
- Македонските војници како бројка не се многу, но се медицинско-санитетска поддршка на целокупните сили на ЕУФОР преку медицинската ќелија и се високо квалификувани и спремни, рече Баир.
Претседателот Иванов им оддаде почит на единаесетмината припадници на АРМ што трагично загинаа во 2008 година, враќајки се од успешно завршената мисија АЛТЕА.
Република Македонија во моментот партиципира со десет член медицински тим и два офицери во командата на ЕУФОР, а во мисијата во БиХ учествува од 2006 година.

Честитка до новоизбраниот Претседател на Република Полска Бронислав Коморовски
Вторник, 06 Јули 2010

Претседателот на Република Македонија д-р Ѓорге Иванов денес ја упати следната честитка до новоизбраниот Претседател на Република Полска Бронислав Коморовски. Почитуван господине Коморовски, Дозволете ми, од свое лично име, и од името на граѓаните на Република Македонија да Ви упатам најсрдечни честитки за изборот на функцијата Претседател на Република Полска. Воедно, ја користам можноста, да Ви посакам успех во извршувањето на оваа одговорна функција, натамошен просперитет на Вашата земја и благосостојба на пријателскиот полски народ. 
Во оваа свечена пригода, сакам да го изразам задоволството од досегашниот развој на традиционално пријателските односи меѓу нашите две земји, како и своето длабоко уверување дека соработката и натаму ќе се развива и продлабочува во сите сфери од заемен интерес. На тој план, сакам да го повторам мојот, и на Република Македонија интерес за одржување на континуиран политички дијалог и на соработката на сите нивоа, како на билатерален, така и на мултилатерален план.
За мојата земја од исклучителна важност е отворената поддршка што Република Полска и ја дава на патот кон целосно интегрирање во европските и евроатлантските структури. Граѓаните на Република Македонија и јас лично, посебно ја цениме поддршката од Република Полска за нашето уставно име. За таквата поддршка и во оваа прилика ја повторувам мојата, и на граѓаните на Република Македонија, голема и искрена благодарност.
Со надеж дека ќе ја имам честа наскоро лично да Ви го честитам изборот, Ви ги упатувам изразите на моето највисоко почитување.
д-р Ѓорѓе Иванов

Писмо на сочувство до Претседателот на Романија
Вторник, 06 Јули 2010
 
Почеток < Пред 161 162 163 164 165 166 167 168 169 170 Следно > Крај
Страница 170 од 180