Новости
slavejcinja_4
Прием за учесниците на 47-то издание на фестивалот за детски песни „Златно славејче“
Сабота, 18 Ноември 2017

Претседателот на Република Македонија, д-р Ѓорге Иванов, денеска ги прими учесниците на 47-то издание на фестивалот за детски песни „Златно славејче", што се одржува под негово покровителство.

Претседателот Иванов упати честитки за успешното реализирање на фестивалот, што се одржа по четириесет и седми пат, посакувајќи следната година уште многу нови детски хитови, коишто ќе бидат обележје за идните генерации.

Златните славејчиња низ песна се заблагодарија за денешниот прием како и за континуираната поддршка од македонскиот претседател. Директорот на фестивалот Бобан Јосифовски изрази задоволство што „Златно славејче" од година во година забележува се поуспешна реализација.

Како и минатата, така и оваа година, на фестивалот учествуваа гости од соседните земји кои своите песни ги изведоа на македонски јазик. Првиот ден од секое издание на фестивалот има хуманитарен карактер и е наменет за децата со посебни потреби.

Првото издание на фестивалот „Златно славејче" се одржал на 23 мај 1970 година, во организација на Сојузот за грижи и воспитување на децата на Град Скопје. Оттогаш традиционално, веќе 47 години, во рамки на одбележувањето на ослободувањето на градот Скопје, 13-ти ноември, „Златно славејче" е  дел од музичката лектира на најмладите.
slavejcinja_13

Vinko_Pulic
Средба со сараевскиот надбискуп, кардиналот Винко Пулиќ
Сабота, 18 Ноември 2017

Претседателот на Република Македонија, д-р Ѓорге Иванов, денеска ги прими сараевскиот надбискуп, кардиналот Винко Пулиќ, генералниот викар на босанската надбискупија, монсињор Лука Туњиќ, жупникот дон Давор Топич и бискупот скопски и апостолски егзарх, д-р Киро Стојанов.

На средбата, претседателот Иванов истакна дека нашата држава има длабока традиција на почитување на различните верски чувства, како и плодна соработка со Католичката црква и нејзината конструктивна улога како столб на меѓунационалната и меѓурелигиска коегзистенција.

Кардиналот Пулиќ кој е во пасторална посета на црквата во Македонија, му се заблагодари на претседателот Иванов за неговиот придонес  кон настанот по повод прогласувањето на Мајка Тереза за светица и истакна дека со одбележувањето на нејзината канонизација беше испратена силна порака за Македонија.

Претседателот Иванов истакна дека граѓаните на Скопје се горди што живеат во родниот град на Мајка Тереза, место во кое таа ги стекнала добрината и правдината и место каде се негува традицијата на почит кон различноста, а почитувањето е повозвишена филозофија на толеранцијата.
vinko_pulic_5

OBSE_GenSek
Средба со г. Томас Гремингер, генерален секретар на ОБСЕ
Четврток, 16 Ноември 2017

Претседателот на Република Македонија, д-р Ѓорге Иванов, денеска го прими г. Томас Гремингер, генерален секретар на ОБСЕ.

На средбата беа разменети мислења за севкупната соработка меѓу Република Македонија и ОБСЕ, поддршката на напорите и реформите во различни области, особено во однос на владеењето на правото, судството, изборното законодавство, децентрализацијата, меѓуетничките односи.

Претседателот Иванов на средбата ја истакна важноста на поддршката што ОБСЕ ја дава за реформските напори во Република Македонија, и изрази очекување за продолжување и продлабочување на плодната соработка.

На средбата претседателот Иванов посочи на потребата од јасна и отворена порака во насока на деблокада на интеграцијата на Република Македонија во европските и евроатлантските структури.

- Силно верувам дека е време да се видат конкретни активности од страна на европските институции и земјите-членки на НАТО во однос на нашиот евроатлантски интегративен процес. Без јасна и отворена порака од европските институции, нашите реформски напори нема да бидат доволни и ќе предизвикаат уште поголемо незадоволство кај граѓаните, рече претседателот Иванов на средбата со генералниот секретар на ОБСЕ, г. Гремингер.

Соговорниците разменија мислења за состојбите во поширокиот регион, особено во контекст на мигрантската и бегалска криза и предизвиците поврзани со справувањето со заканите од насилен екстремизам и активностите на странски терористички борци.

UNICEF
Средба со г. Бенџамин Перкс, претставник на УНИЦЕФ во Република Македонија
Среда, 15 Ноември 2017
10
Церемонија на свечена промена на државното знаме
Петок, 10 Ноември 2017
Chatam_house_PRM_3
Иванов: Мигрантската криза е лекција до европската бирократија да сфати дека ЕУ се уште не е Европа, без интегриран Балкан
Четврток, 02 Ноември 2017

Претседателот на Република Македонија, д-р Ѓорге Иванов, во обраќањето во Кралскиот институт за меѓународни односи „Чатам хаус" во Лондон, порача дека Европската Унија мора да изнајде нов начин на носење на одлуки во време на криза и потенцираше дека европските земји мора да имаат поголем слух за заедничките безбедносни закани.

„Балканот, за жал останува надвор од Европската унија. Ова искуство со мигрантската криза е лекција до европската бирократија да сфати дека Европската унија се уште не е Европа и не може да зборува од името на Европа. Балканот се уште не е дел од Европската унија.  И се додека Балканот не влезе во Европската унија, ЕУ ќе се соочува со ова што сега го имаме. Научивме дека во Европската унија безбедносните служби немаат доверба меѓу себе. Не ги споделуваат информациите, и не постои свест дека постои заедничка закана. Тероризмот не е оној кој бил во шеесеттите, седумдесеттите години. Тероризмот ги користи сите нови технологии, социјални мрежи, користи дури кодирани сателитски врски и секој пат е понапред од било која полиција или разузнавачка служба", рече претседателот Иванов во обраќањето на тема „Македонија, миграциите и безбедноста: научени лекции".

„Оставени сами на себе, како држава увидовме дека мора да ги преземеме нештата во свои раце. Македонија најуспешно се справи со мигрантите. Колку што можеше, им помагаше на сите. Многу е лесно да се критикува од неутрална позиција, без да имате одговорност за последиците од сето тоа што се случуваше за време на мигрантската криза", порача претседателот на Република Македонија.

Зборувајќи за безбедносниот аспект на кризата, претседателот Иванов истакна дека иако балканската мигрантска рута е затворена, илегалната миграција се уште не е спречена и дека криминалните криумчарски мрежи имаат главна улога во генерирање на безбедносните закани за Македонија и Европа.

Претседателот Иванов пред присутните во „Чатам хаус" го образложи планот со кој Македонија успеа да го регулира мигрантскиот бран со еден влез и еден излез. „Се покажа дека кризата не може да се реши само со политички декларации и бирократски процедури, туку мора да се менаџира со помош и поддршка и од страна на безбедносните служби и армиски структури", рече претседателот Иванов.

„Тоа наше искуство, подоцна го прифатија и други земји од Балканската рута, и армијата беше таа која и помогна на полицијата во контролата и регулирањето, со што пролетта 2016 Балканската рута се затвори", рече македонскиот претседател.

Македонскиот претседател истакна дека миграциите не се завршени, бидејќи во непосредна близина на надворешните граници на Европа се наоѓаат меѓу 20 и 30 милиони потенцијални мигранти.

Претседателот Иванов констатираше дека на балканските држави им е потребна Европската Унија бидејќи луѓето едноставно сакаат правна сигурност.

Во рамки на работната посета на Велика Британија, македонскиот претседател одржа обраќање на престижната Оксфордска унија и оствари средби со спикерите на двата дома на британскиот Парламент.
Chatam_house_PRM_5

 
Почеток < Пред 1 2 3 4 5 6 7 8 9 10 Следно > Крај
Страница 1 од 176