Говори и обраќања
MKD-BIH_web
Официјална посета на г. Младен Иваниќ, Претседавач со Претседателството на Босна и Херцеговина
Среда, 19 Април 2017


MKD-BIHПочитувани претставници на медиумите,

Почитуван претседавач со претседателството на Босна и Херцеговина, г. Иваниќ,

Дозволете ми да ви посакам срдечно добредојде во Република Македонија и да изразам задоволство од реализацијата на Вашата официјална посета.

Денеска со мојот пријател и колега, господинот Иваниќ, имавме навистина одлична и содржајна средба, на којашто разговаравме за сите прашања што се од заеднички интерес за Македонија и Босна и Херцеговина.

Би сакал да изразам задоволство од досегашниот развој на односите и на соработката меѓу нашите две држави, кои ги карактеризира традиционално силно пријателство, идентични ставови за развојот на меѓународната и регионалната соработка, со заеднички стратегиски цели – мир и стабилност во регионот, членство во европските и евроатлантските структури.

Република Македонија, континуирано на сите можни начини, отворено и јасно дава поддршка на територијалниот интегритет и суверенитет на Босна и Херцеговина.

Го поздравуваме напредокот на земјата во процесот на евроинтеграција и очекуваме дека наскоро ќе ги предаде одговорите на Прашалникот, по што Европската унија ќе даде позитивно мислење за членството на Босна и Херцеговина во Европската Унија.

Со г. Иваниќ разменивме мислења и за состојбите во регионот.

Констатиравме дека евроинтеграцијата на државите од нашиот регион е од суштинско значење за стабилноста на целиот регион, развој и просперитет. Единствен одговор на ситуацијата во регионот е напредок во процесот за интеграција во Европската Унија.

Затоа, констатиравме дека од приоритетно значење е отворањето на преговорите за членство, особено поглавјата 23 и 24 за сите земји од регионот кои не се членки на Европската унија, бидејќи со тие области се соочуваат нашите земји и тоа со областа на правосудството, основните права, правдата, слободата и безбедноста. Мислиме дека доколку има моќ, сила во Брисел да се отворат овие две поглавја од сите земји во целиот регион и состојбата во целиот регион би била поинаква.

На средбата со господинот Иваниќ разменивме информации и мислења околу актуелните состојби во нашите две земји.

Г-нот Иваниќ го запознав со случувањата во земјата по предвремените парламентарни избори од 11 декември минатата година, како и со правната и со политичката пречка по однос на определувањето на мандат за состав на Влада на Република Македонија.

Во однос на постизборната платформа како политичка пречка, го повторив ставот дека со неа се руши Уставот и Охридскиот рамковен договор, а Република Македонија се доведува во положба на потчинетост и зависност од друга држава. Со тоа се загрозува сувереноста, самостојноста и унитарноста на државата.

Заеднички се согласивме дека ваквото мешање во внатрешните работи на Република Македонија е поттик за реализирање на големо националистички идеи и дека она што ни е најпотребно во моментов е намалување на тензиите во регионот и промена на реториката којашто ја слушаме во последно време во целиот регион.

Со мојот соговорник разменивме мислења и за економската соработка бидејќи Босна и Херцеговина е на листата на 20 најголеми економски партнери на Република Македонија. Засега трговската размена меѓу двете земји е околу 155 милиони долари. Малиот суфицит е постојано на македонска страна, но тоа е основа да работиме многу повеќе на економската соработка и тоа ќе биде основа и на бизнис форумот кој ќе се одржи во текот на утрешниот ден.

Ви благодарам.

Evroaziski_Forum_01
Обраќање на претседателот Иванов на 20. Евроазиски економски форум во Истанбул
Четврток, 06 Април 2017

Почитувани присутни,
Дами и господа,
Драги пријатели,

Како Претседател на Република Македонија, задоволство ми е да учествувам на 20. Евроазиски економски самит. Цели две децении, овој значаен форум нуди можност за искрен дијалог и за искрена размена на идеи за предизвиците со кои се соочуваат нашите држави и региони. Уверен сум дека барем дел од тие споделени идеи го нашле своето место во процесите на носење одлуки и  во решенијата на предизвиците. Како и секогаш така и денес ние имаме тема што бара квалитетна дебата.

Неодамна, на 60-годишнината од Римските договори, 27 европски лидери ја усвоија Римската декларација. Во неа, тие се обврзуваат дека во наредните десет години ќе работат на создавање унија што ќе биде сигурна и безбедна, просперитетна, компетитивна, одржлива и општествено одговорна, со волја и капацитет да игра клучна улога во светот.

Во услови кога Унијата се соочува со бројни кризи, многумина би рекле дека ова се премногу амбициозни, па дури и неостварливи цели.

Да се зборува за кризите на Европската Унија стана клише. Кризи има на секој чекор: од кризата на еврозоната, преку политичката, мигрантската и безбедносната криза, па сè до Brexit. Блискиот Исток, Кафказот и Балканот сè уште се кошмар за бриселските политичари. На јужниот и на источниот брег на Медитеранот има многу пропаднати држави и разорени општества.

Но, во овој наратив за европските кризи се губи од пред вид една важна работа. Имено, се заборава дека кризата е само метафора позајмена од медицината што се однесува на мошне краток временски период во кој организмот се бори со одредена болест или состојба. Но, кризите на Унијата се сè, само не кратки. Веќе две години се соочуваме со мигрантската криза. Идната година ќе се наврши првата деценија од економската криза. Унијата влегува од една во друга криза, без притоа да реши ниту една од кризите. Ваквата загрижувачка состојба бара редефинирање на проблемот.

Клаус Офе нè потсетува дека Европа не е само во криза, туку и во стапица на сопствената бирократија. Кризата ги парализира токму оние конструктивни актери кои би биле способни на дело да ги спроведат неопходните стратегии и промени со кои може да се надмине кризата и да се спречи нејзино повторно појавување.

Истовремено, Унијата се соочува со бројни внатрешни тензии: меѓу центарот и периферијата, меѓу кредиторите и должниците, меѓу еврооптимистите и евроскептиците, но и меѓу оние кои се повеќе и оние кои се помалку интегрирани.

Како последица, наспроти бриселскиот елитизам, имаме растечки популизам. Наместо десуверенизација, имаме повторна суверенизација. Наместо интеграција имаме сè поголема фрагментација.

Сево ова би поттикнало некои Римската декларација да ја сведат на сентиментален, но нереален оптимизам. Но, дали е така?

Историјата нè потсетува дека во најмрачното време на Европа, кога на власт доаѓа фашизмот и нацизмот и се шират авторитарните и тоталитарните режими, група луѓе го создадоа идеалот за Европа како слобода. Доволно е да се сетиме дека по Втората светска војна, сонот на неколкумина стана надеж за многумина. Со падот на Берлинскиот ѕид, проектот на Европската Унија стана дел од политичкиот либерализам и либералниот поредок.

Денес, кога на европската политичка сцена повторно се јавува левиот и десниот популизам, ксенофобијата, исламофобијата, исклучивоста, границите, треба повторно да се понуди нова идеја. Ова е време за пресоздавање на Европа – метаморфоза на Европа. Но, што значи тоа?

Урлих Бек нè потсетува дека суштината на Европската Унија е европеизацијата како процес на постојана трансформација. Европеизацијата не значи исчезнување на националните држави, туку метаморфоза на самата идеја за нацијата и државата. Тоа е идеја дека целината е повеќе од нејзините составни делови, и дека оваа целина им овозможува на составните делови, на државите и општествата полесно да се соочуваат со глобалните предизвици.
Evroaziski_Forum_02

Почитувани присутни,

Во пресрет на римскиот самит, петте претседатели на Унијата излегоа со пет сценарија за иднината на Европа.

Според првото сценарио, Унијата би продолжила како и досега. Имајќи предвид дека Унијата таква каква што е се најде затекната од сите кризи, сметам дека ова е лажна опција.

Според второто сценарио, Унијата би се свела на заедничкиот пазар. Од една страна,  ова е само привидно раскрстување со политичката димензија, бидејќи без политичка соработка нема услови за заеднички пазар. Понатаму, што е со предизвиците кои бараат европски ангажман, како мигрантската криза? Тоа значи европските региони ќе мораат да прават стратегиско свртување навнатре, онака како што направи Вишегратската група во однос на мигрантската криза.

Според третото сценарио, Унијата мора да прифати поголема диференцијација за да избегне потенцијална дезинтеграција. Тоа е моделот на Европа во повеќе брзини што подразбира дека оние држави кои се подготвени ќе се интегрираат побрзо и подлабоко од другите. Но, ако локомотивата е побрза од вагоните, тогаш постои опасност во еден момент вагоните да се одвојат.

Според четвртото сценарио, Унијата би се фокусирала на помалку области кои би ги извршувала со поголема ефективност. Но, како ќе се утврди кои се тие нешта, имајќи ги предвид различните интереси и потреби на државите членки и нивните граѓани?

Според петтото сценарио, Унијата да прави многу повеќе, но заедно.

Кој пат и да го одберат, земјите членки на Европската Унија неминовно ќе наидат на каменот на сопнување на Унијата, а тоа се двојните стандарди. Денешните двојни стандарди се идни штетни преседани.  Ќе ви го дадам примерот со Република Македонија.

Од почетокот на независноста пред 26 години, Република Македонија имаше за цел да стане дел од Европската Унија и од либералниот поредок. Но, токму во либералниот поредок што ги афирмира идентитетските права и слободи, нашите неотуѓиви права и слободи на самоидентификација се оспорени. Токму Европската Унија чие мото е единство во различноста, ја негира нашата различност. Не случајно еден наш филозоф заклучи дека за Македонија политичкиот либерализам заврши во оној момент кога ни се оспори името и идентитетот. Двојните стандарди на либералниот поредок нам ни го оспориja правото на идентитет, но и правото на просперитет. На Македонија ѝ се блокираат нејзините европски и евроатлантски интеграции. Затоа, на случајот Македонија станува очигледно лицемерието на овој меѓународен поредок кој колабира поради своите двојни стандарди. Не само Македонија туку и многу други земји не се задоволни од двојните стандарди на Унијата.

Затоа, кое и од овие пет сценарија да биде избрано, Европската Унија, која беше мировен проект, треба повторно да стане препознатлива по својата најголема моќ, а тоа е европеизацијата. Преку европеизацијата, Унијата успеа да ги поттикне државите и општествата на европскиот континент доброволно да се трансформираат. Само преку европеизацијата се гради Европа. Само преку европеизација може да се шири просторот на мир, безбедност и просперитет во непосредното и поширокото европско соседство – во Северна Африка, на Блискиот Исток, на Кафказот. Балканот не го спомнав, бидејќи тој е коренот на Европа. Но, Европа треба допрва да се сети и да се врати на корените.

На Европа не ѝ се потребни нови принципи и вредности. Потребни ѝ се лидери кои можат да видат дека европеизацијата е спас за сите држави на нашиот континент.

Дами и господа,

Ќе завршам со една фраза од Римската декларација. Во неа, лидерите потсетуваат дека Европската Унија започна како сон на неколкумина, а стана надеж за многумина. На тоа денес можеме да додадеме дека Унијата која беше сон, што прерасна во надеж, ќе биде реалност за сите нас само доколку остане верна на својата суштина – на европеизацијата како процес на метаморфоза на Европа.

Ви благодарам.
Evroaziski_Forum_03 

TUSK03042017
Средба со Претседателот на Европскиот Совет, г. Доналд Туск
Понеделник, 03 Април 2017


PRM_TuskПочитувани претставници на медиумите,


Денеска, по трет пат за две години сум домаќин на Претседателот на Европскиот Совет, господинот Доналд Туск, кој е во посета на Република Македонија.

На самиот почеток, сакам да изразам јавна благодарност до Претседателот Туск за неговиот личен ангажман во справувањето со бегалската и мигрантска криза. Тој имаше големо разбирање за товарот што како држава го носевме во однос на мигрантската криза, особено за безбедносниот аспект на истата. Тој лично се ангажираше да ни помогне.

Претседателот Туск е искрен пријател на Република Македонија и поддржувач на нашите европски аспирации.

На нашата средба доминираше темата за заканата од илегална миграција со која се соочува Европа. Разговаравме и за политичката криза во Македонија по изборите во декември 2016 година.

Со претседателот Туск разменивме мислења и информации за мигрантските коридори, тензиите меѓу ЕУ и Турција, капацитетите на транзитните држави, но и за ризиците по регионалната стабилност од постојаната закана од мигрантски бран насочен кон Европа од Африка и Азија.

Во рамките на денешната посета, претставници на Агенцијата за разузнавање и Армијата на Република Македонија одржаа класифициран брифинг за развој на сценарија врз основа на степенот на ризик од заканата од илегална миграција и капацитетите со кои располагаме.

Повторивме дека Република Македонија е транзитна земја и дека останува на ставовите и барањата изнесени на состанокот на шефови на држави и влади во Брисел во октомври 2015 година.

На средбата искажавме интерес за правна рамка за партнерство со Унијата во однос на три прашања. Прво заштита на границите, второ, контратероризмот и трето, кризниот менаџмент во услови на блокада на ЕУ интеграцииите а во процес на обликување на идната безбедносна и одбранбена архитектура на Унијата.

Сакам да истакнам дека Република Македонија, како и досега, така и во иднина ќе дејствува во заштита на својата национална безбедност и сигурноста на своите граѓани. Но, истовремено, Македонија е чувар и на портите на Европа и повеќе од 19 месеци врши контрола на преминот за влез во најбрзиот мигрантски коридор што води кон Европа.

Мојата порака до Европската унија е јасна: помогнете ни, за да ви помогнеме. Помагајќи и на Македонија, си помагате себе си.

Со Претседателот Туск разговаравме и разменивме мислења и за актуелната политичка состојба во Република Македонија.

Детално го запознав со моите уставни овластувања како Претседател на Република Македонија, како и со воспоставената практика од 1992 година за определување на мандатар за состав на нова влада.

Во оваа прилика, сакам уште еднаш недвосмислено да порачам. Мојот став останува непроменет. Правната и политичката пречка мора да се отстранат. Целта на двата услови е новата Влада да не биде оспорена од ниту една страна и по ниту една основа. Мојата одлука е превентивна, за да спречиме штетни последици со кои би се соочиле. Уценета Влада е нестабилна Влада со краток рок на траење и штетни последици.

Ќе потсетам дека Европската Унија е гарант на само два договори – Охридскиот рамковен договор и договорот од 2015 година.

Оттука, императив за партиските лидери треба да биде спроведување на ургентните реформски приоритети. Прва точка на дневниот ред на партиите и пратениците треба да бидат европските реформи, а не спроведување на пост изборна платформа креирана во туѓи држави. Платформа со која се загрозува независноста на државата, се условува постигнување на парламентарно мнозинство, се уценува составот на нова влада. Се нарушуваат добрососедските односи со директно мешање во внатрешните работи во Македонија, се поттикнуваат тензии во меѓуетничките односи, се манипулираат граѓаните со прашања кои се надвор од рамковниот договор, се бара промена на Уставот. Затоа, на Република Македонија и се потребни европски реформи, а не туѓи платформи.

Како држава мора да се фокусираме на европските реофрми. Само реформите ќе ни помогнат да го искорениме коренот на политичките кризи. Но, тоа не е само наш предизвик, туку и на добар дел од регионот. Затоа, сметам дека Европската Унија треба да најде начин да ги отвори 23-то и 24-то поглавје за правосудството, основните права, правдата, слободата и безбедноста, и тоа за сите земји кандидати и потенцијални кандидати од регионот.

А за да се спречи блокирање на процесите, Европската унија треба да најде начин процесот на пристапување да не се злоупотребува за уцена при решавањето на билатерални прашања. Блокадата на евроинтеграцискиот процес на Република Македонија мора да прекине, и тоа час поскоро.

На крајот, уште еднаш, сакам да му изразам благодарност на Претседателот Туск за неговото разбирање, неговиот ангажман и неговата поддршка.

Ви благодарам.

orden_ar_1
Обраќање по повод доделувањето Орден на Агенцијата за разузнавање
Петок, 24 Март 2017

Почитувани присутни,
Ценети екселенции,
Дами и господа,
Драги пријатели,

Како Претседател на Република Македонија и како врховен командант на вооружените сили постојано носам одлуки од делокругот на мојата надлежност – надворешната политика, безбедноста и одбраната.

Од лично искуство знам дека клучот за исправните одлуки е вистината. Само тогаш кога знаеме што е вистина, а што е лага, ние можеме да донесеме одлука за доброто на граѓаните и на државата. Но, ова станува сè потешко. Вистината никогаш немала толку непријатели како што има денес. Во нашето време на поствистина, многу лесно е да се биде заведен од лажните вести, алтернативните факти и речиси сеприсутната пропаганда. Со други зборови, од лисјата на лагите честопати не се гледа стеблото и коренот на предизвикот со кој се соочуваме.

Новата ера на суровиот 21 век е време на сложени војни, во кои прва жртва е вистината. И токму затоа, ни треба чувар на вистината. Во вакви услови, исклучително значајна улога имаат институциите кои не само што ја филтрираат вистината од лагата, туку и со аналитичкиот пристап нудат решенија за предизвиците со кои се соочуваме.

Веќе 20 години, една агенција има токму таква улога. Тоа е Агенцијата за разузнавање на Република Македонија. При нејзиното формирање, на Агенцијата за разузнавање ѝ беше доверен клучот за осознавање и за проверка на вистината поврзана со безбедносните закани и ризици. Благодарение на нејзините издржани анализи и истражувања на податоците и информациите, државниот врв може да носи одлуки за доброто на граѓаните и на државата.

Агенцијата постојано нè информира за процесите што генерираат закани по националната безбедност и по трајните и витални вредности. Со тоа Агенцијата ни помага да носиме одлуки во насока на воспоставување стабилно безбедносно опкружување и одржлив развој на долгорочен план.

Во овие 20 години, Агенцијата помогна да избегнеме многу погрешни одлуки, но и полесно да ги пребродиме најголемите премрежија со кои сме се соочиле како држава.

Доволно е да се сетиме на првата деценија од независноста, кога во непосредното опкружување на Република Македонија се водеа војни, се менуваа граници, се формираа нови држави. Во тие сложени услови, ние успеавме да го зачуваме мирот.

Во втората деценија на независноста, нештата се променија. Регионот се смири и се демократизира. Државите почнаа да соработуваат и заеднички да чекорат по европскиот и евроатлантскиот пат. Но, заканите не исчезнаа, само добија нови форми.

Денес, во третата деценија на независноста на Република Македонија, нашето стратегиско безбедносно опкружување одново се менува. Недоволното присуство на Европската Унија придонесе кон ретроградни процеси во нашиот регион. Сведоци сме на отворено мешање во внатрешните работи на државата. Се менува и геополитичката слика на светот. Имаме нови закани и нови ризици. Илегалната миграција, насилниот екстремизам, странските терористички борци и транснационалниот организиран криминал се само дел од бројните предизвици со кои секојдневно се соочува Република Македонија.

Но, успеваме да се соочиме и да ги менаџираме овие предизвици, благодарение на нашиот разузнавачко-безбедносен систем, чиј важен дел е Агенцијата за разузнавање на Република Македонија.

Преку раното предупредување, процените и прогнозите и благовремените информации, Агенцијата ни помага да ги превенираме заканите и да ја чуваме независноста, сувереноста и територијалниот интегритет на Република Македонија. И, сето тоа го прави со законитост.

Токму затоа имам голема чест, како Претседател и како врховен командант на вооружените сили на Република Македонија, од името на граѓаните, да ја одликувам Агенцијата за разузнавање со Орден „Илинден 1903". Ова одликување е израз на благодарноста на македонските граѓани за сето она што во изминатите години Агенцијата го прави, дури и кога тоа не е видливо за јавноста. Но, истовремено, ова одликување е обврска Агенцијата да продолжи, со уште поголема ревност, професионално да ги извршува своите законски обврски. Пред сè, да продолжи со остварувањето на основните државни интереси на Република Македонија и на нејзините граѓани.

На самиот крај, ве уверувам дека во време кога се соочуваме со големи внатрешни и надворешни предизвици, ние не се плашиме, бидејќи знаеме дека ќе истраеме во нашата цел. Знаеме, бидејќи нашите одлуки се темелат врз две вредности – вистината и правдата за нашата татковина, Република Македонија.

Ви благодарам.

Obrakjanje_Karaula_Ramna_niva_01
Обраќање на свеченоста по повод Денот на резервните сили кај караулата „Рамна Нива“
Петок, 10 Март 2017

Почитуван началник на Генералштабот на Армијата на Република Македонија,

Пoчитуван претседател на Сојузот на резервни старешини на Република Македонија,

Господа генерали,

Претставници на медиумите,

Драги пријатели,

На денешен ден пред дваесет и пет години, токму на ова место, на караулата „Рамна Нива", припадниците на резервниот состав гордо го подигнаа знамето на Република Македонија. Тој чин беше почеток на заокружувањето на еден од неопходните атрибути на самостојноста на Република Македонија, а тоа формирање на сопствена армија. Во време кога во нашиот регион беснееше безбедносна бура, а некои од нашите соседи се сомневаа во нашата државотворност, ние одлучно започнавме да ги обезбедуваме државните граници на нашата млада држава.

Од своето осамостојување до денес, Република Македонија води политика и гради систем што ќе овозможи нејзина целосна евроатлантска интеграција,  во согласност со нејзините интереси, потреби и можности. Трансформацијата и модернизацијата на одбранбениот систем претставуваат наша цврста определба и обврска која и покрај некои објективни потешкотии, успешно се реализираат.

Армијата на Република Македонија го сочинува највиталниот дел на единствениот одбранбен систем на Република Македонија и како таква во изминатиот период даде најголем придонес за исполнувањето на високите стандарди на полето на одбраната. Тоа се покажува и со успешното и професионално справување со заканата од илегалната миграција на нашата јужна граница.

Во периодот од дваесет и петте години развој, Армијата на Република Македонија се развива со целосно професионален состав, дизајнирана со структура на сили со развиени соодветни родовски компоненти.

Сето ова ни овозможува, нам, како членка во меѓународните организации, заедно со земјите членки на НАТО, а особено со земјите од непосредното и поширокото соседство, активно да учествуваме во градењето на интегративните процеси на полето на одбраната и безбедноста.

За мене, како Претседател на Република Македонија, е вистинска чест да бидам врховен командант на вооружените сили кои со толкава посветеност ја извршуваат својата уставна и законска задача.

Obrakjanje_Karaula_Ramna_niva_02Ценети присутни,

Резервниот состав одигра клучна улога во самите почетоци на нашата армија. Како тогаш, така и денес, 25 години подоцна, за нашата татковина развојот на резервниот состав поставува важна задача. Современите безбедносни предизвици со кои се соочуваме од нас бараат примена на современ, унифициран и сеопфатен систем за образование и обука како на активниот, така и на резервниот состав на Армијата на Република Македонија.

Развојот на активен и резервен армиски состав, опремен со борбени вештини, способности и знаења за извршување на различни мисии како во земјата така и надвор од нејзините граници е клучен за две нешта:

Прво, доследно извршување на мисијата и задачите кои на Армијата на Република Македонија ѝ се доделени со Уставот и со законите на Република Македонија.

И второ, достигнување на интероперабилност и компатибилност со земјите членки на НАТО.

Односот помеѓу активната и резервната компонента на Армијата на Република Македонија мора да го трансформираме во согласност со мисијата и со задачите на АРМ, прилагодени за ефикасна одбрана на целата територија на Република Македонија. Во функција на ова, приоритетна цел за нас ќе биде одбранбеното планирање, кое јасно ја дефинира потребата од изедначување на оспособеноста и опременоста на резервата на ниво на активната компонента.

Поаѓајќи од сопствените потреби, а во согласност со современите трендови, резервните сили треба да се трансформираат во поефикасна вооружена компонента, со соодветна и прилагодена организациска структура.

Затоа, главна задача на Министерството за одбрана и на Генералштабот на АРМ е дополнително да ја зацврстат поврзаноста меѓу активниот и резервниот состав. Ваквиот сериозен приод кон резервата во иднина ќе значи редефинирање на резервата во одбранбениот систем и несомнено вклучување на сите субјекти од одбраната во процесот на планирање на обуката, вежбите и опременоста на резервата, во насока таа во наредниот период постепено да се изедначува со активниот состав.
Svecenost_Karaula_Ramna_niva_02

Почитувани присутни,

Ќе завршам онака како што започнав.

И денес, како и пред четврт век, се соочуваме со предизвици. Но, и денес, како и пред четврт век, ја имаме Армијата на Република Македонија која е заштитник од заканите, гордост на граѓаните и надеж за мир во земјата.

Токму од ова место, кревањето на македонското знаме го означи остварувањето на вековниот стремеж на генерации востаници, илинденци и борци за слободата на Македонија. Знамето што пред четврт век се крена тука, на Рамна Нива, претставуваше јасна и недвосмислена порака дека ова е територија на суверена и независна држава. Држава која е мирољубива и отворена за соработка со сите добронамерници. Но, истовремено, држава со своја сопствена армија која е подготвена по секоја цена да ги штити територијалниот интегритет и независноста на Република Македонија.

Ви благодарам.
Svecenost_Karaula_Ramna_niva_03 

prm
Обраќање на Претседателот на Република Македонија д-р Ѓорге Иванов
Среда, 01 Март 2017

Почитувани граѓани на Република Македонија,

Пред два дена, на 27 февруари, ми беше доставен доказ дека е создадено мнозинство во Собранието на Република Македонија. Во таа прилика им честитав на партиите кои успеале да создадат мнозинство бидејќи тоа е важен чекор кон излез од кризата.

Денеска го поканив лидерот на Социјалдемократскиот сојуз на Македонија, господинот Зоран Заев на консултативна средба во однос на одлуката за доделување мандат за состав на Влада на Република Македонија.

На средбата го запознав за сите правни мислења за кои вчера разговарав со компетентни правни експерти. Според нив, во согласност со член 90, мнозинството е постигнато и тоа е основа за да се додели мандатот за состав на Влада.

Сепак, според правните експерти, проблем се роковите.

Имено, за да се испочитува член 90 од Уставот на Република Македонија останува исполнувањето на роковите кои се утврдени со Устав.

Почитувањето на роковите е неопходно за трансферот на власта да биде легален и легитимен. Разговаравме за повеќе решенија како да се надмине проблемот со роковите и да се додели мандатот, а притоа одлуката да не биде во спротивност со член 90 од Уставот.

Ова прашање е лесно надминливо и за тоа постојат решенија, особено сега кога е веќе создадено и обезбедено мнозинство во Собранието. Во спротивно, мојата одлука за доделување на мандат без запазување на рокот од 10 дена даден во член 90 може да биде оспорена.

На господинот Заев му предложив да изврши консултации и да ме извести за нивниот став за понудените решенија.

Препорачав да се држиме до воспоставената практика од 1992 година, кога и во трите обиди за формирање на Влада се почитувани уставно утврдените рокови од 10 дена. Ме информираа дека Социјалдемократскиот сојуз на Македонија останува на ставот дека роковите во Уставот и воспоставената практика од 1992 година не се пречка за доделување на мандатот и бараа доделувањето на мандатот да биде веднаш.

Покрај оваа формална-правна пречка, постои и многу посуштествен проблем. Еве за што станува збор:

По изборите бевме непријатно изненадени од една постизборна политичка платформа од туѓа држава. Платформата е постизборен документ изработен и потпишан во туѓа држава во кабинет на странски државник и со посредство на премиер на туѓа држава. Содржината на платформата е надвор и од Уставот и од Охридскиот рамковен договор.

Со оваа платформа се загрозува сувереноста и независноста на државата, доведувајќи ја во положба на потчинетост или зависност спрема друга држава. Со оваа платформа, Република Македонија е уценета, а нејзината унитарност, сувереност и независност се загрозени.

Процесот на пост-изборно коалицирање и формирање на нова Влада стана заложник на оваа пост-изборна платформа од туѓа држава. Наместо конечно да излеземе од политичката криза, поради оваа платформа ние за жал заглавуваме во уште подлабока криза во која се доведоа во прашање темелните државни интереси на Република Македонија и нејзините граѓани.

Долго време очекував дека одредени политички партии ќе покажат државотворност и зрелост и јавно ќе одбијат воопшто да зборуваат за таквата туѓа пост-изборна платформа.

За жал, видовме дека наместо веднаш и без дискусија да ја отфлат, некои почнаа со неа да лицитираат, несфаќајќи дека всушност лицитираат со унитарниот карактер на државата, со идентитетот на граѓаните и државните интереси. За карактерот и иднината на државата не може да се преговара, ниту да се водат разговори на нетранспарентен начин. Граѓаните имаат право да ја знаат вистината за содржината од разговорите.

Но, и за ова има решение. За време на средбата од господинот Заев побарав јавно и јасно да ја отфрли и осуди оваа платформа, бидејќи, македонските граѓани на изборите гласаа за реформите и за исполнување на обврските од договорот од Пржино, а не за пост-изборна платформа на туѓа држава.

Оттука, втората, суштинска забелешка е дека разговарање за содржината или преговарање за платформа на туѓа држава е спротивно на Уставот на Република Македонија.

И не само тоа, туку преговарањето и прифаќањето на туѓа платформа е казниво дело според кривичниот законик, бидејќи тоа значи доведување на Република Македонија во положба на потчинетост или зависност спрема друга држава.

Драги сограѓани,

Од меѓународната заедница очекувавме јасно и јавно да ја осуди таквата платформа која претставува бескрупулозно мешање во внатрешните работи и редефинирање на унитарниот карактер на нашата држава.

Многу добро се сеќаваме дека меѓународната заедница излегуваше со такви ставови во случајот со други држави од регионот. За жал, во случајот со Македонија такво јавно осудување немаше. Ваквиот гласен молк ни потврди дека иднината на Македонија сега зависи само од нас, нејзините граѓани и нејзините институции.

Мојата порака е јасна. Штом се воздржа од осудување на платформата што ја загрозува сувереноста и унитарноста на државата Република Македонија, сега меѓународната заедница треба исто така да се воздржи и од наметнување решенија кои би биле во спротивност со државните интереси на Република Македонија.

Почитувани сограѓани,

Преговарањето за платформа на туѓа држава значи негирање на суверенитетот и самостојноста на Република Македонија како што е наведено во Член 1 од Уставот на Република Македонија.

Во Република Македонија суверенитетот произлегува од граѓаните и им припаѓа на граѓаните. Никој од граѓаните на ниту еден демократски избран претставник не му дал право, преговарајќи за пост-изборна платформа на туѓа држава да го загрозува суверенитетот на Република Македонија.

Македонските граѓани на изборите гласаа за партиски програми а не за постизборна платформа на туѓа држава.

Ова се сериозни моменти од историјата на Република Македонија. Секој еден од нас мора најодговорно да се однесува, затоа што секоја погрешна одлука може да има несогледливи катастрофални последици за иднината на државата.

Кога ја превзедов функцијата Претседател на Република Македонија, согласно Уставот, на седницата на Собранието ја дадов и свечената изјава со која се обврзав функцијата да ја вршам совесно и одговорно, се обврзав да ги почитувам Уставот и законите и да ги штитам суверенитетот, територијалниот интегритет и независноста на Република Македонија.

Во согласност со оваа моја заклетва, ниту Уставот ниту совеста не ми дозволуваат да дадам мандат на секој оној кој го руши суверенитетот и независноста на Република Македонија.

Драги сограѓани,

Слушам како ме обвинуваат дека со моите досегашни постапки сум ја злоупотребувал службената должност и дека сум можел да добијам кривична пријава. Ги охрабрувам иницијаторите тоа и да го направат. Оние кои деновиве ми се закануваат ги повикувам да покренат и прашање за моја одговорност во согласност со Уставот. И во оваа прилика јасно им кажувам – не постојат закани и уцени што ќе ме натераат да го прекршам Уставот.

Но, истовремено ги охрабрувам да поднесат кривична пријава согласно Кривичниот законик на Република Македонија и против секој оној кој ја доведува Република Македонија во положба на потчинетост и зависност спрема друга држава.

Во согласност со Член 84 од Уставот на Република Македонија, јас нема да определам мандат за состав на Влада на Република Македонија на секој оној кој преговара за платформи на други држави со кои се уценува македонскиот народ, се загрозува унитарноста на државата, нејзнинот суверенитет и независноста.

Туѓи пост-изборни платформи не можат и не смеат да бидат основа за формирање на Влада на Република Македонија.

Драги сограѓани,

Ние немаме резервна држава. Република Македонија е единствената држава што ја имаме. И немаме историско право да го уништуваме она за што се бореле и гинеле генерации. Тие ни ја оставиле оваа држава за да им ја оставиме на се уште неродените, на нашите деца и потомци.
Затоа, сакам да ве уверам, вас граѓаните, дека можете да бидете спокојни.

Сè додека сум Претседател на Република Македонија, нема да дадам мандат ниту на човек ниту на партија што се залага или во својата програма има платформа за рушење на суверенитетот, територијалниот интегритет и самостојност на Република Македонија. Бидејќи длабоко верувам дека ова се темелни вредности со кои никој нема право да тргува. И не мислам да отстапам од нив.

Ви благодарам.

 
Почеток < Пред 1 2 3 4 5 6 7 8 9 10 Следно > Крај
Страница 1 од 54